უკრაინის საგარეო საქმეთა მინისტრი დმიტრო კულება რუსეთთან მოლაპარაკებების მონაწილეებს ურჩევს, არაფერი ჭამონ ან დალიონ და თავი შეიკავონ საგნების ზედაპირზე ხელის შეხებისგან. ამის შესახებ დმიტრო კულებამ უკრაინული ტელეარხების ეთერში ტელემარათონის დროს განაცხადა.
„ვურჩევ ყველას, ვინც რუსეთის ფედერაციასთან მოლაპარაკებებზე მიდის, არ ჭამონ ან არ დალიონ რამე. ასევე სასურველია, თავი შეიკავონ ნებისმიერ ზედაპირზე შეხებისგან. ყველა ეს ისტორია – ვიღაცამ სადღაც რაღაც მოისმინა – ახლა ბევრი ამგვარი რამე ვრცელდება, რადგან ყველას სწყურია ახალი ამბები, სენსაციები“, – განაცხადა კულებამ.
ცნობისთვის, გამოცემა “Wall Street Journal”-მა სანდო წყაროზე დაყრდნობით ინფორმაცია გაავრცელა, რომლის თანახმად, რუს ოლიგარქს, რომან აბრამოვიჩსა და უკრაინული დელეგაციის 2 წევრს, რომლებიც ერთმანეთს კიევში, მარტის დასაწყისში, სამშვიდობო მოლაპარაკებების ფარგლებში შეხვდნენ, შეხვედრის შემდეგ, სავარაუდოდ, მოწამვლის სიმპტომები ჰქონდათ.
შეგახსენებთ, დღეს სტამბულში რუსეთ-უკრაინის სამშვიდობო მოლაპარაკებების მეოთხე რაუნდი იმართება.
კომენტარები