ტელევიზიის სამი თანამშრომლის ქმედება, სამწუხაროა, მაგრამ იმ ფაქტის წინაშე გვაყენებს, რომ ჯერ ტელევიზიის შიგნით ცდილობდნენ შანტაჟით და პროვოკაციებით საკუთარი მდგომარეობის გაუმჯობესებას, ამჯერად კი იგივეს გარედან აკეთებენ, – ამის შესახებ საზოგადოებრივი მაუწყებლის გადაცემა “აქტუალური თემის” წამყვანი მაკა ცინცაძე სოციალურ ქსელში წერს:
“სამაგიეროდ, ბევრ კითხვას ბადებს სამეურვეო საბჭოს თავმჯდომარის პოზიცია და განცხადებები. ქალბატონი ირინა ფუტკარაძე იტყუება, როდესაც ამბობს, რომ ეს ინფორმაცია ჰქონდა პირველი არხის სამეურვეო საბჭოს მხოლოდ(!!!) რამდენიმე წევრს და არა ბორდის სრულ შემადგენლობას. ქალბატონო ირინა, თქვენ ამბობთ, რომ „ამ ეტაპზე ვერანაირ სერიოზულ კომენტარს ვერ გააკეთებთ, სანამ საბჭოს წევრებთან ერთად ქარტიის წერილს არ განიხილავთ“ .
პირველი არხის დისკრედიტაციის მცდელობაში როგორც ჩანს პირველის არხის ბორდის თავმჯდომარეც ჩაერთო. საზოგადოებას უნდა ვუთხრათ, რომ პირველი არხის თანამშრომლებს, ჯერ კიდევ ერთი თვის წინ გვქონდა რამდენიმესაათიანი შეხვედრა პირველი არხის სამეურვეო საბჭოს წევრებთან და არარსებული ე.წ. „შავ სიაში“ დასახელებული რამდენიმე გვარი სწორედ მათგან მოვისმინეთ. ამ შეხვედრას ვიდეოზარით ესწრებოდა ირინა ფუტკარაძეც. იმედია, სამეურვეო საბჭოს წევრები გაიხსენებენ და დაგვეთანხმებიან.
გარდა ამისა, პირველი არხის თანამშრომლებმა ჯერ კიდევ თებერვალში განცხადებით მივმართეთ სამეურვეო საბჭოს, სადაც დეტალურად აღვწერდით, რომ მიმდინარეობდა არხის მიზანმიმართული დისკრედიტაცია, საქმიანი რეპუტაციის შელახვის მცდელობა და უსაფუძვლო ბრალდებების ტირაჟირება. მოვითხოვეთ, რომ საბჭოს ემოქმედა საკუთარი კომპეტენციის ფარგლებში და შეესწვლა საკითხი. თვეზე მეტი გავიდა ჩვენს მიერ სამეურვეო საბჭოსთვის წერილით მიმართვიდან, თუმცა, მათგან პასუხი ამ დრომდე არ გვაქვს! როგორც შევიტყვეთ, ბორდის ნაწილმა თავი აარიდა ამ საქმის შესწავლას და ამაში თავისი წვლილი შეიტანა თავმჯდომარემ. დღეს მისგან მოვისმინეთ, რომ თურმე არაფერი იცოდა და აუცილებლად შეისწავლის ქარტიის განცხადებას. კითხვას გისვამთ სამეურვეო საბჭოს წევრებს, რა ჰქვია ამას?! საბჭოს თავმჯდომარის მიკერძოებული და ცალმხრივი განცხადებები ბევრ კითხვებს ბადებს. მართალია, დღეს განაცხადა, რომ ამ საქმის შესახებ არაფერი ვიცოდიო, თუმცა, ჯერ კიდევ ჩვენი პოზიციის მოსმენამდე ირინა ფუტკარაძემ ერთ-ერთ ჟურნალისტს განუცხადა, რომ ის სრულად დაუჭერდა მხარს დარსალიას.
რასაკვირველია, ეს ყველაფერი დამატებით შეკითხვებს აჩენს მის ობიექტურობასთან და მიუკერძოებლობასთან დაკავშირებით. პატივცემულო საბჭოს წევრებო, იმედი გვაქვს, თქვენ ნამდვილად გახსოვთ ჩვენი შეხვედრის და საუბრის შესახებ, როცა დაგვპირდით, რომ საკითხს შეისწავლიდით და მას შემდეგ ვიცდით, თუმცა, ცილისწამებები სულ უფრო იმატებს. დღეს ამაში თავად თავმჯდომარეც ჩაერთო. მოვითხოვთ, სამეურვეო საბჭოს თავმჯდომარე პირველ რიგში ტელევიზიის თანამშრომლებს შეგვხდეს და აგვიხსნას, რას ემსახურება მისი წინააღმდეგობრივი და უცნაური განცხადებები,” – წერს მაკა ცინცაძე Facebook-ში.
“აიპრესი” ამ საკითხთან დაკავშირებით საზოგადოებრივი მაუწყებლის სამეურვეო საბჭოს თავმჯდომარესაც დაუკავშირდა, რომელმაც მოგვწერა:
“კომენტარი ეხებოდა ქარტიის განცხადებას, მომართვის შემთხვევაში საბჭოს წევრები განვიხილავთ, შესაბამისად ამ საკითხთან დაკავშირებით მეტ კომენტარს არ გავაკეთებ. მე ვარ საზოგადოებრივი მაუწყებლის მხარდამჭერი, ამასთან რიგ საკითხებთან დაკავშირებით მაქვს ჩემი პოზიციები. ვინ ვის რა უთხრა, ეს მე არ მაინტერესებს, მარტივად არასერიოზულია,” – მოგვწერა ირინა ფუტკარაძემ.
კომენტარები