ჰოლანდიის ბრედას სასამართლომ წინასწარი დაკავების იზოლატორიდან ორი უკრაინელის გათავისუფლების გადაწყვეტილება მიიღო, რათა მათ წინააღმდეგობა გაუწიონ რუსეთის შეჭრას უკრაინაში – ამის შესახებ Euractiv იტყობინება.
27 და 29 წლის მამაკაცები ლუცკიდან ადამიანებით ვაჭრობის ბრალდებით ექვსი თვით დააკავეს.
ისინი გასული წლის სექტემბერში იახტაზე დააკავეს, როცა ალბანელთა ჯგუფის ბრიტანეთში გადაყვანას ცდილობდნენ.
დაკავებულების ადვოკატმა სასამართლოს სთხოვა მათი გათავისუფლება, რათა ისინი სახლში დაბრუნდნენ და დაიცვან თავიანთი ქვეყანა შემოჭრისაგან.
სასამართლომ დაკავებულები „განსაკუთრებული და მძიმე გარემოების“ მოტივით გაათავისუფლა. მამაკაცები პატიმრობიდან რამდენიმე პირობით გაათავისუფლეს. მათ უნდა მოერიდონ სხვა დანაშაულის ჩადენას, სასამართლოს მოთხოვნით დაბრუნდნენ წინასწარ პატიმრობაში და საჭიროების შემთხვევაში მოიხადონ სასჯელი, თუ სასამართლო კვლავ გადაწყვეტს მათ პატიმრობას.
კომენტარები