თურქეთმა უარი განუცხადა უკრაინის ელჩს თხოვნაზე, რომ ბოსფორისა და დარდანელის სრუტეებში რუსულ სამხედრო ხომალდებს მიმოსვლა შეუზღუდოს. ინფორმაციას თურქეული მედია ავრცელებს.
აღნიშნულთან დაკავშირებით განცხადება გააკეთა ქვეყნის საგარეო უწყების ხელმძღვანელმა.
თურქეთის პოზიცია დასაწყისიდანვე ცნობილია – ჩვენ, როგორც სახელმწიფომ, რომელიც ერთმანეთთან დაპირისპირებულ ორივე ქვეყანასთან ვმეგობრობთ, ვითარების განსამუხტად ჩვენი ძალისხმევა ვაჩვენეთ.
ანექსიისა და ომის წინააღმდეგი ვართ, აღიარების წინააღმდეგი ვართ. უკრაინის ტერიტორიულ მთლიანობას მხარს ვჭერთ. ჩვენ ამ ომში მონაწილე მხარე არ ვართ, ჩვენ არ ვართ ის მხარე, რომელიც რაიმე სახის კონფლიქტში ჩაერთვება. ჩვენ ჩვენს პრინციპულ პოზიციას დავიცავთ, რომელიც დაბალანსებულია და სამართლიანობასა და საერთაშორისო სამართლის დაცვას ემხრობა. სამხედრო მოქმედებების რაც შეიძლება სწრაფად დასასრულებლად ჩვენს ხელთ არსებულ ყველა საშუალებას გამოვიყენებთ,”- განაცხადა ჩავუშოღლუმ.
თურქეთის საგარეო საქმეთა მინისტრი უკრაინის მოთხოვნას გამოეხმაურა, ბოსფორისა და დარდენელის სრუტეებში რუსული სამხედრო გემები არ გაატარონ.
„უკრაინამ ოფიციალური განაცხადი გააკეთა. მონტროს შეთანხმების არსი ძალიან ღია და ცხადია – ომში, სადაც თურქეთი მხარე არ არის, ომში ჩართულ სხვა მხარეებთან დაკავშირებით გარკვეული ზომების მიღების შესაძლებლობა არსებობს. თურქეთს შეუძლია ბოსფორისა და დარდანელის სრუტეებში საბრძოლო გემების გატარება შეაჩეროს. პირველად იმას ვადგენთ, საომარი მდგომარეობა არსებობს თუ არა. მხოლოდ საომარი მდგომარეობის აღიარების შემდეგ, მონტროს შეთანხმების ფარგლებში ვკრძალავთ საომარი გემების გასვლას. მაგრამ რომც ავკრძალოთ, რუსეთს ასეთი უფლება აქვს – თუ გემები საკუთარ ბაზაზე დაბრუნებას მოითხოვენ, ისინი უნდა გავატაროთ,”- განაცხადა ჩავუშოღლუმ.
კომენტარები