რუსეთის მიერ უკრაინის ტერიტორიაზე სამხედრო მოქმედებების დაწყებას მოსკოვის საფონდო ბირჟაზე პანიკური ვაჭრობა და აქციების ფასის რეკორდული ვარდნა მოჰყვა. ქვეყნის მთავარი Moex-ის ინდექსი დღეს 38%-ით დაეცა. შემცირებულია ყველა მსხვილი კომპანიის აქციების ფასი:
Gazprom-ის აქციები დღეს 54%-ით; Lukoil-ის 47%-ით; Rosneft-ის 58%-ით; Inter Rao-ს 54%-ით; Yandex-ის 43%-ით; Magnit-ის 44%-ით; Sberbank-ის 57%-ით დაეცა.
პარალელურად, ისტორიულ მინიმუმზეა რუსული რუბლის ღირებულება. ამ დროისთვის ერთი დოლარი 86.5 რუბლი ღირს, რაც 6%-იანი გაუფასურებაა.
ეს რუსული საფონდო ბაზრის არსებობის ისტორიაში ყველაზე მკვეთრი ვარდნაა.
უკრაინაში რუსეთის ფედერაციის მიერ სამხედრო მოქმედებების დაწყების შემდეგ უკრაინის პრეზიდენტმა ვლადიმერ ზელენსკიმ ქვეყნის მასშტაბით საომარი მდგომარეობა გამოაცხადა; ქვეყანაში დაიხურა საჰაერო სივრცეც. რუსეთმა სარაკეტო დარტყმები განახორციელა უკრაინულ ქალაქებზე.
აშშ, ევროკავშირი და დიდი შვიდეული რუსეთის მიმართ ახალი ეკონომიკური სანქციების დაწესებაზე იმსჯელებენ.
bm.ge
კომენტარები