ენმ-ს ფრაქციის თავმჯდომარე ხატია დეკანოიძე ირაკლი ღარიბაშვილის დღევანდელ განცხადებას სახიფათოდ და ადამიანის ჯანმრთელობის წინააღმდეგ მიმარეთულად მიიჩნევს. „პასუხისმგებლობა ადამიანებზე, ვინც ამის შემდეგ ვაქცინაციაში დაეჭვდება, საქართველოს პრემიერ-მინისტრმა უნდა აიღოს,” – აღნიშნავს დეკანოიძე.
“მაშინ, როდესაც პრემიერმინისტრმა უკრაინის მხარდასაჭერი განცხადება არ გააკეთა და ჩვენი საერთაშორისო პარტნიორების პოზიციაა, რომ შესაძლებელია დღე- დღეზე რუსეთის სამხედრო აგრესია დაიწყოს უკრაინის წინააღმდეგ, პრემიერი გამოდის ანტივაქსერული განცხადებით. ეს ხდება მაშინ, როდესაც ინფიცირების შემთხვევები ძალიან მაღალია და პანდემიის მართვა არის ძალიან მძიმე, დაბალ ნიშნულზე. ეს არის სახიფათო და ადამიანის ჯანმრთელობის წინააღმდეგ მიმართული განცხადება. ეს მოწმობს იმას, რომ პრემიერმინისტრს სურს, რაღაცნაირად სტატისტიკა შეალამაზოს და ამიტომ ამბობს, რომ ვაქცინა არ მუშაობს. ამ განცხადებას საქართველოს მოსახლეობის ჯანმრთელობის დამაზიანებელ განცხადებად მივიჩნევ და პასუხისმგებლობა ადამიანებზე, ვინც ამის შემდეგ ვაქცინაციაში დაეჭვდება, საქართველოს პრემიერმინისტრმა უნდა აიღოს” – განაცხადა ხატია დკანოიძემ.
ცნობისთვის, ირაკლი ღარიბაშვილმა მწვანე ბარათის გაუქმების მიზეზად ის ფაქტი დაასახელა, რომ ომიკრონის შემთხვევაში ვაქცინაცია არ მუშაობს.
„ომიკრონის დროს“, უმეტეს შემთხვევაში ვაქცინა არ მუშაობს. ვაქცინირებულ პირს ჩვეულებრივ ემართება „ომიკრონი“. მაგალითად, მე ვარ ერთი მაგალითი – მქონდა სხვა შტამი გასულ წელს, ორჯერ ვიყავი აცრილი „ფაიზერის“ ვაქცინით, მაგრამ მაინც დამემართა „ომიკრონი“. მინდა გითხრათ, რომ აბსოლუტურ შემთხვევებში ძალიან მსუბუქ ფორმებში მიმდინარეობს აღნიშნული ვირუსი. მიდგომა შეიცვალა, რადგან აზრი დაკარგა „მწვანე ბარათის“ გამოყენებამ, ამიტომ ჩავთვალეთ საჭირო მისი გაუქმება.” – აღნიშნა ირაკლი ღარიბაშვილმა.
კომენტარები