მოკლული ჟურნალისტის, გიორგი სანაიას ყოფილი მეუღლის, ხათუნა ჩხაიძის სახლი გატეხეს.
“ფორმულას” ინფორმაციით, ადგილზე საგამოძიებო მოქმედებები მიმდინარეობს.
პირველადი დათვალიერებით ადგილიდან არაფერი დაკარგულა. როგორც ჩხაიძემ ფორმულას განუცხადა, მას ბინაში არეულობა დახვდა.
“შემატყობინეს, რომ ჩემი სახლის კარები იყო ღია. აღმოჩნდა რომ პოლიციელებიც უკვე მოსულები იყვნენ. გარედან გასაღების ადგილი იყო ჩაკეტილი. შიგნით, სახლში ნივთები იყო არეული. ზოგიერთი უჯრა იყო არეული, ზოგი კი ხელუხლებელი. რამე წაიღეს თუ არა ჯერ არ ვიცი, მაგრამ ჯერჯერობით არაფერი ჩანს დაკარგული სახლიდან. ვინ იყო შემოსული და რა მიზნით ჩემთვის უცნობია. ასეთი რამ არ მომხდარა, პირველი შემთხვევაა და ძალიან გაკვირვებული. მინდა ჩატარდეს გამოძიება და დაადგინონ ვინ იყო შემოსული. შეიძლება რამდენიმე პირიც იყო შემოსული”, – განაცხადა ჩხაიძემ.
აღსანიშნავია, რომ 27 იანვარს ვახო სანაიას ეთერში საქმის ოქროს მოწმემ რეზონანსული განცხადებები გააკეთა. კონსტანტინე ციხისთავმა ფორმულას ეთერში განაცხადა, რომ ჟურნალისტის მკვლელობა პრემიერმინისტრის ირაკლი ღარიბაშვილის სიმამრმა, თამაზ თამაზაშვილმა, მაშინდელმა შს მინისტრის მოადგილემ ვლადიმერ ბაკურაძემ და შოთა ჭიჭიასვილმა დაგეგმეს და შეასრულეს.
კომენტარები