ჯარისკაცების წამების საქმე – დაიბარებენ თუ არა შინაგან საქმეთა მინისტრის მოადგილეს, იოსებ ჭელიძეს გამოკითხვაზე, ეს რამდენიმე დღეში გაირკვევა.
რამდენიმე წუთის წინ, საქმეზე მსჯავრდებულის, გოგიტა ბიჩელაშვილის ადვოკატმა, გამოძიების დაწყების მოთხოვნით პროკურატურას უკვე მიმართა. განცხადებაში შინაგან საქმეთა სამინისტროს კიდევ ერთი მაღალჩინოსანი, შსს-ს ობიექტების დაცვის დეპარტამენტის უფროსის ზვიად კალატოზიშვილის, იაღლუჯას ბაზის ხელმძღვანელის, გიზო ბუთბაიას და მამუკა ზურაბაშვილის გვარებიც ფიგურირებს.
განცხადებას საფუძვლად უდევს “შაბათის ეთერის” მიერ მომზადებული სკანდალური რეპორტაჟი და ის სკანდალური აუდიოჩანაწერი, რომელიც “ტვ პირველმა” გაასაჯაროვა.
ჩანაწერებში იაღლუჯას ბაზის ინსტრუქტორი ხელს პირდაპირ ვახტანგ გომელაურის მოადგილეს ადებს და ამბობს რომ, იოსებ ჭელიძე იყო საქმის ჩაფარცხვის ინიციატორი.
ჯარისკაცების წამების გახმაურებულ საქმეზე ორი პირი, ცვლის უფროსები არიან გასამართლებული – დიმიტრი დევდარიანი და გოგიტა ბიჩელაშვილი, ხოლო მესამე ბრალდებული მერაბ ბარბაქაძე გაურკვეველ ვითარებაში გარდაცვლილი იპოვეს. გამოძიების მტკიცებით, მან თავი მოიკლა, თუმცა ოჯახს ამ ვერსიის არ სჯერა და აცხადებს, რომ მერაბ ბარბაქაძე მოკლულია.
“უთხრეს, რომ როგორც ბარბაქაძემ ამ საქმისთვის ტავი მოიკლა, მოვედით სანახავად, გვეგონა უკვე ხეზე ჩამოკიდებული იქნებოდი. ზეწოლა გადმოვიდა შენზე. აიღე შენს თავზე დანაშაული და მერე ჩვენ საპროცესო გარიგებას გაგიფორმებთ. ეს გოგიტამ არ გააკეთა, რადგან ის დამნაშავე არ არის”– აცხადებს ბიჩელაშვილის ადვოკატი.
საქმეში ჩართული კიდევ ერთი იურისტი, ფრიდონ სიხუაშვილი საქმის პროკურორების დასჯას ითხოვს, რადგან მისი თქმით, შსს-ს მაღალჩინოსნის მხრიდან საქმის ჩაფარცხვის შესახებ მათთვის ცნობილი იყო, თუმცა არაფერი მოიმოქმედეს:
შინაგან საქმეთა მინისტრის მოადგილე, იოსებ ჭელიძე, ზედმეტსახელად “მოზგი”, პირდაპირ ჩარეულია სისხლის სამართლის საქმის გაყალბებაში და დანაშაულის არგამოძიებაში. ვეუბნები შოთაძეს და გომელაურს, ისინიც თანამონაწილეები არიან. საჩივარი მოიცავს პროკურორების, ალექსანდრე ჩხეიძისა და ლევან ქუთათელაძის, გამომძიებელ ვასილ კაკალაშვილის მიერ სავარაუდო დანაშაულის დაფარვას. მათ გამოძიების ეტაპზე ყველა ეს ინფორმაცია ჰქონდათ”- თქვა “ტვ პირველთან”ფრიდონ სიხუაშვილმა.
კომენტარები