“ხელები გადამიტრიალეს, მცემეს, მხოლოდ ყვირილი შემეძლოო… ორნი იყვნენო…” – ნაცემი შშმ პირის მამა

ისნის მეტროსადგურში ნაცემი არასრულწლოვნის მამა “ტელეკომპანია პირველთან” ჰყვება რა უამბო შვილმა:

“დამიჭირეს, ხელები გადამიტრიალეს, შემიყვანეს და მცემესო. ორნი იყვნენ, როცა კაბინეტში შემიყვანეს, არაფრის გამოო. რომ მცემეს, შემდეგ გამიშვესო. ასეთი რამ როგორ შეიძლება? ეს არაადამიანობაა, როგორ შეიძლება ბავშვის, ყრუ-მუნჯის ცემა? ჩემი ამხანაგები იყვნენ და 6 ვიყავითო. ამას მარტო შეეძლო ეყვირა თავის ენაზე, შეიძლება, შეეშინდა რომ სცემეს, ქვა უნდა მესროლაო”.

არასრულწლოვნის მეგობარი კი ჰყვება, რომ სამართალდამცავის აგრესია ესკალატორის მოაჯირზე ჩამოჯდომას მოჰყვა.  

სახელმწიფო ინსპექტორის სამსახურის ინფორმაციით, დამამცირებელი ან არაადამიანური მოპყრობისა და სამსახურეობრივი უფლებამოსილების ბოროტად გამოყენების ბრალდებებით.  

“საპატრულო პოლიციის ერთმა თანამშრომელმა არასრულწლოვანს რამდენჯერმე დაარტყა მუშტი თავის არეში და მოქაჩა თმაში. მიუხედავად არასრულწლოვნის მინიშნებისა, რომ იგი იყო სმენადაქვეითებული და არ ესმოდა საუბარი, პოლიციის თანამშრომელი აგრძელებდა გამეტებით მის ცემას. ძალადობის ფაქტს შეესწრნენ არასრულწლოვნის თანმხლები პირებიც. აღნიშნული ქმედებით არასრულწლოვანმა მიიღო დაზიანებები თავისა და სახის არეში, განიცადა ძლიერი ფიზიკური ტკივილი და თავი იგრძნო დამცირებულად”. – აცხადებს სახელწმიფო ინსპექტორის სამსახური.   

შეგახსენებთ, ვიდეო გუშინ, 24 იანვარს გამოქვეყნდა და ისმის საუბარი მოქალაქესა და პოლიციელს შორის:

“მოქალაქე: ხელი გაუშვით
პოლიციელი: შენ ხომ გვიცნობ?
მოქალაქე: ყრუ-მუნჯია
პოლიციელი: მანდ უნდა იაროს მერე?
მოქალაქე:ყრუ-მუნჯია თქო
პოლიციელი: შენ ხომ ჭკვიანი ხარ? შენ ხომ გესმის? უნდა დაარიგო მერე
მოქალაქე: ყრუ-მუნჯია, რა უნდა ვუთხრა?
პოლიციელი: ეს ყრუმუნჯია? რო ავალაპარაკო ეხლა?
მოქალაქე: მიდი აალაპარაკე და მილიონს მოგცემ
პოლიციელი: მოდი, ეხლა უნდა ავალაპარაკო”