სოციალური მომსახურების სააგენტოს თანამშრომლები ჯანდაცვის სამინისტროსგან ხელფასების მატებას ითხოვენ.
ისინი ამბობენ, რომ თუ უწყება მოთხოვნებს არ დააკმაყოფილებს, ორშაბათიდან სამსახურში აღარ მივლენ, შემდეგ კი საპროტესტო აქციასაც გამართავენ. განცხადებას ხელს 400-მდე პირი აწერს.
“შეტყობინება გაფიცვასთან დაკავშირებით შემოვიტანეთ. საქართველოს მასშტაბით სააგენტოს ცენტრების უმრავლესობა გაიფიცება. ამ ცენტრებიდან უმრავლესობა შეაჩერებს თავის საქმიანობას იქამდე, სანამ მათი მოთხოვნები არ იქნება დაკმაყოფილებული”, – თქვა სოლიდარობის ქსელის იურისტმა, დავით ომსარაშვილმა მედიასთან.
სოციალური მომსახურების სააგენტოს თანამშრომლებსა და სამინისტროს შორის მოლაპარაკებები ჯერ კიდევ ყოფილი მინისტრის, ეკა ტიკარაძის დროს დაიწყო, თუმცა პრობლემა ამ დრომდე მოუგვარებელია.
სააგენტოს თანამშრომელი დღეს ჯანდაცვის ახალ მინისტრთან, ზურაბ აზარაშვილთან შეხვედრას ითხოვდნენ, თუმცა უწყების ხელმძღვანელი მათ არ შეხვდა.
კომენტარები