უკრაინის ვიცე-პრემიერთან, ოლგა სტეფანიშინასთან გამართულ ერთობლივ პრესკონფერენციაზე ნატოს გენერალურმა მდივანმა, იენს სტოლტენბერგმა განაცხადა, რომ ნატო-რუსეთის საბჭოს სხდომის წინ, ალიანსი მჭიდრო კონსულტაციებს მართავს უკრაინასთან, საქართველოსთან, მოლდოვასთან, ფინეთთან, შვედეთთან და ევროკავშირთან.
„მივესალმები იმას, რომ რუსეთი დათანხმდა ჩვენს შეთავაზებას ნატო-რუსეთის საბჭოს სხდომის ჩატარების თაობაზე. ეს დადებითი სიგნალია. ჩვენ ყურადღებას გავამახვილებთ ევროპის უსაფრთხოების საკითხებზე, სამხედრო აქტივობებთან დაკავშირებულ გამჭვირვალობაზე, რისკის შემცირებასა და შეიარაღების კონტროლზე. ჩვენ მოვუსმენთ რუსეთის შეშფოთებას, მაგრამ ნებისმიერი მნიშვნელოვანი დიალოგი ასევე უნდა ითვალისწინებდეს ჩვენს შეშფოთებას რუსეთის ქმედებებთან დაკავშირებით. ეს უნდა მოხდეს უკრაინასთან კონსულტაციით, როგორც ამას დღეს ვაკეთებთ. ჩვენ ასევე მჭიდრო კონსულტაციებს ვაწარმოებთ სხვა პარტნიორებთან, მათ შორის საქართველოსთან, მოლდოვასთან, ფინეთთან, შვედეთთან და ევროკავშირთან“, – აღნიშნა ნატოს გენერალურმა მდივანმა.
ნატო-რუსეთის საბჭოს სხდომა 12 იანვარს გაიმართება. მხარეები ევროპის უსაფრთხოებასთან დაკავშირებულ საკითხებს, უკრაინაში და მის ირგვლივ განვითარებულ ვითარებასა და სამხედრო საქმიანობასთან, ურთიერთგამჭვირვალობასა და რისკის შემცირებასთან დაკავშირებული საკითხებს განიხილავენ.
კომენტარები