“ყველას გავუგზავნე საახალწლოდ მისალოცი, პერსონალური და არც ერთმა მათგანმა პასუხი არ გამცა” – ლევან იოსელიანი “ნაციონალურ მოძრაობაზე”

“მოქალაქეების” ერთ-ერთი ლიდერი, ლევან იოსელიანი, “ტვ პირველთან” ამბობს:

“ნაციონალური მოძრაობა დღემდე ჩვენ არ განგვიხილავენ თავიანთ პარტნიორებად, დღემდე თლიან, რომ ისინი არიან მთავარი და დანარჩენი მათ ქვეშ უნდა მოიაზრებოდეს. პოლიტიკური ცხოვრების წესი მათ უნდა ისწავლონ. მათ უნდა ისწვალონ საკუთარ კოლეგებთან ურთიერთობა, მათ უნდა ისწვალონ, როცა გილოცავენ, ამაზე მადლობის თქმა.

ყველას გავუგზავნე საახალწლოდ მისალოცი, პერსონალური და არც ერთმა მათგანმა პასუხი არ გამცა, როცა სხვა ჩემმა კოლეგებმა ქართული ოცნებიდან და სხვა პარტიებიდანაც, ასევე მომილოცეს ახალი წელი. ეს ელემენტარული რაღაცაა და ამ ელემენტარული რაღაცეებით იწყება ურთიერთობა ადამიანებს შორის. ამას იმიტომ ვყვები რომ, ჩვენ გვაქვს ძალიან რთული ისტორია ურთიერთობის ერთმანეთთან, მაგრამ ამ ყველაფერს შეიძლება გადახედო, თუ ხედავ პერსპექტივას, რომ ისინი შენთან ურთიერთობენ როგორც პარტნიორთან. საკმარისია ოდნავ მეტი ძალაუფლება ჩაიგდონ ხელში და მაშინვე შენ მათთვის იქნები თავდასხმის და ბულინგის ობიექტი. არ მჯერა, რომ არ გაიმეორებენ იგივეს, რაც ერთხელ უკვე გააკეთეს ჩემსა და ალეკოს მიმართ, გირჩის მიმართ. ჩვენ უნდა გვქონდეს განცდა, რომ როცა დასჭირდებათ, მეორე წუთში ტალახს არ მოგასხამენ.”

შეგახსენებთ, პარტია “მოქალაქეები” არ უჭერს მხარს მიხეილ სააკაშვილის საქმეზე პარლამენტში საგამოძიებო კომისიის შექმნას და ამის მიზეზად, ლევან იოსელიანმა დაასახელა ის, რომ არ სურს პარლამენტში უახლოესი თვეების მთავარი თემა იყოს მიხეილ სააკაშვილი, არ სურს რომ ეს პერსონალიზაცია შეიტანოს პარლამენტშიც.

მან ისაუბრა სასამართლო რეფორმაზე და თქვა, რომ სჯობდა მწვავე კითხვები მოსამართლეებისათვის სწორედ ნაციონალურ მოძრაობას დაესვა, რადგან ის მოსამართლეები “მათი დანიშნულნი იყვნენ და მათ ბრძანებებს ასრულებდნენ.”