„ორღობის პოლიტიკანობით ვართ დაკავებული ამ ნაახალწლევს. ვერაფერი ვისწავლეთ ამ 30 წელიწადში“ – ამის შესახებ რესპუბლიკური პარტიის ერთ-ერთი ლიდერი დავით ბერძენიშვილი სოციალურ ქსელში წერს და ყაზახეთში მიმდინარე მოვლენებს ეხმიანება.
„ყაზახეთის პრეზიდენტმა რუსეთს და სხვა სამხედრო მოკავშირეებს(“ოდეკაბე”) მიმართა დახმარებისთვის. აშკარად ვერ უმკლავდება შეტევაზე გადასულ პროტესტანტებს, რომლებმაც ნაზარბაევის ძეგლიც ჩამოაგდეს და სახელისუფლებო შენობებსაც შეუტიეს.
დასავლეთი (აშშ, პირველ რიგში) უკრაინას მინსკის შეთანხმებების დაცვას მოსთხოვს თუ ევროატლანტიკური არჩევანის უფლებას დაუდასტურებს?
გადარეული პუტინის ერთგვარი, ნაწილობრივი დაშოშმინების პოლიტიკას არჩევს თუ შეღრენას?
საქართველოში აშშ საელჩოს გუშინდელი მკვეთრი განცხადებაც პოსტსაბჭოთა სივრცეში მიმდინარე მოვლენების კონტექსტია განსახილველი, ჩემი აზრით. გაცილებით უფრო მნიშვნელოვანი პროცესები მიდის ჩვენს სამეზობლოში, ვიდრე ჰგონია ბევრს.
რისკიც გვეზრდება და შანსიც…ჯერჯერობით საფრთხე მეტი ჩანს.
ამ დროს რას ვშვებით? კორექტულად ვიტყვი – აზრზე არა ვართ! ორღობის პოლიტიკანობით ვართ დაკავებული ამ ნაახალწლევს. ვერაფერი ვისწავლეთ ამ 30 წელიწადში….
ისევ ჩვენი “ჭყპყ” ამბები, ტიპები და საფიქრალი გვგონია სამყაროს ჭიპი,”- წერს დავით ბერძენიშვილი.
კომენტარები