მიხეილ სააკაშვილის ულტიმატუმის ამოწურვამდე რამდენიმე საათი რჩება. ყოფილი პრეზიდენტი სამედიცინო მომსახურებას, კონფიდენციალურობის დაცვას და სატელეფონო ზარების უფლებას ამ დრომდე ითხოვს. მიხეილ სააკაშვილის ჯანმრთელობის დაზიანება სწორედ ხელისუფლების მიზანია, ამიტომ მათ წისქვილზე წყალი არ უნდა დავასხათ, – ამის შესახებ მიხეილ სააკაშვილის ადვოკატმა შოთა თუთბერიძემ ულტიმატუმის ვადის ამოწურვის საკითხზე კომენტირებისას განაცხადა.
“ვფიქრობ, რომ მისი ჯანმრთელობის დაზიანება ხელისუფლების მიზანია, ამიტომ ამ წისქვილზე წყალი არ უნდა დავასხათ. არავითარი არგუმენტი პენიტენციურს არ აქვს. ყველა ადამიანს, რომელსაც თავისუფლება აქვს აღკვეთილი აქვს უფლება ალტერნატიულ სამედიცინო სერვისზე, რაც უნდა პროფესიონალი ექიმები ჰყავდეთ პენიტენციურში, ჩვენ ყველას კარგად გვესმის, რომ ეს არ არის სამედიცინო დაწესებულება, ეს არის თავისუფლების აღკვეთის დაწესებულება. გარდა ამისა, აქ არ არის შესაბამისი აღჭურვილობა, და ასეც რომ იყოს, მიხეილ სააკაშვილს აქვს უფლება მიიღოს ალტერნატიული მომსახურება. ჩვენ არ ვითხოვთ სახელმწიფოს მხრიდან დაფინანსებას და არ ვაკისრებთ დამატებით ტვირთს, ვითხოვთ იმ უფლების რეალიზებას, რაც ყველა აქ მყოფ ადამიანს გააჩნია. ამიტომ ყველანაირი შეზღუდვა, ხელოვნური ბარიერი თუ დაბრკოლება, რომელსაც პენიტენციური სამსახური ქმნის არის უკანონო”,- ამბობს თუთბერიძე.
კომენტარები