კოლექტიური უსაფრთხოების შეთანხმების ორგანიზაცია ყაზახეთში ჯარებს გაგზავნის

კოლექტიური უსაფრთხოების შეთანხმების ორგანიზაციამ (ОДКБ) მიიღო ყაზახეთში ძალების გაგზავნის გადაწყვეტილება. 

ОДКБ-ს წევრი ქვეყნის, სომხეთის პრემიერმინისტრის, ნიკოლ ფაშინიანის ცნობით, ეს გადაწყვეტილება ორგანიზაციის კოლექტიური უსაფრთხოების საბჭომ მიიღო. 

“ყაზახეთის რესპუბლიკის პრეზიდენტის, თოყაევის თხოვნისა და ყაზახეთის ეროვნული უსაფრთხოებისა და სუვერენიტეტისთვის საფრთხის შექმნასთან, რაც გარე ჩარევითაა გამოწვეული, დაკავშირებით ОДКБ-ს კოლექტიური უსაფრთხოების საბჭომ, კოლექტიური უსაფრთხოების შეთანხმების მე-4 მუხლის შესაბამისად, გადაწყვიტა ყაზახეთის რესპუბლიკაში გაგზავნოს ОДКБ-ს კოლექტიური მშვიდობისმყოფელი ძალები”, – განაცხადა ფაშინიანმა.

ძალები ყაზახეთში განსაზღვრული ვადით, სიტუაციის დასტაბილურების მიზნით გაიგზავნება, როგორც ამას ორგანიზაციის წევრები ამბობენ.

ყაზახეთში დაძაბულობის ზრდის ფონზე, ქვეყნის პრეზიდენტმა, ყასიმ-ჟომართ თოყაევმა სიტუაციასთან გამკლავებისთვის დახმარება კოლექტიური უსაფრთხოების შეთანხმების ორგანიზაციას (ОДКБ) სთხოვა.

ყაზახეთში მიმდინარე მოვლენებს თოყაევმა ტერორისტული ქმედებები და გარე აგრესიის აქტი უწოდა და მისი თქმით, საფრთხე ემუქრება სახელმწიფოს მთლიანობას. მისი მტკიცებით, “ტერორისტული ჯგუფები” კარგად არიან მომზადებული და მათ მომზადება საზღვარგარეთ გაიარეს. 

“ტერორისტული ჯგუფები საერთაშორისო სახის არიან. მათ საზღვარგარეთ სერიოზული მომზადება გაიარეს. მათი თავდასხმა ყაზახეთზე შეიძლება განხილული იყოს და განხილული უნდა იყოს, როგორც აგრესიის აქტი”, – თქვა თოყაევმა და დაამატა, რომ ამ საკითხთან დაკავშირებით დასახმარებლად ОДКБ-ს მიმართა. 

ამჟამად ქალაქ ალმათისთან შეტაკებები მიმდინარეობს.

ОДКБ რამდენიმე პოსტსაბჭოთა ქვეყნის სამხედრო ალიანსია. მისი ამჟამინდელი წევრები არიან: რუსეთი, სომხეთი, ბელარუსი, ყაზახეთი, ყირგიზეთი და ტაჯიკეთი. ОДКБ-ს წევრი იყო საქართველოც, 1999 წლამდე. ამ ორგანიზაციის ყოფილი წევრები არიან აზერბაიჯანი და უზბეკეთიც.