მძიმე ღამე ყაზახეთში მთავრობის გადადგომით დამთავრდა – 3 დღიანმა პროტესტმა, რომელიც საწვავზე ფასების ზრდის გამო დაიწყო, ქვეყნის ორ რეგიონში საბოლოოდ მთელ ქვეყანას მოედო და შედეგიც გამოიღო.
სოციალური პროტესტი ეტაპობრივად პოლიტიკურ პროცესში გადაიზარდა და მთელი ქვეყნის მასშტაბით შეუქცევადი ძვრები გამოიწვია – ” ბებერო წადი!” – ეს იყო მთავარი ფრაზა,რომელსაც ქუჩაში გამოსული ათასობით ყაზახი დემონსტრანტი სკანდირებდა და ამ ფრაზის ადრესატი ნურსულთან ნაზარბაევია, რომელიც გადადგომის მიუხედავად, კვლავ რჩება ქვეყნის არაფორმალურ მმართველად.
ყაზახეთის შსს-ს ოფიციალური ცნობით, ამ დროისთვის დაკავებულია 200-მდე დემონსტრანტი, მათ შორის ნურ-სულთანის პოლიციაში 4 საათზე მეტ ხანს იმყოფებოდა “რადიო თავისუფლების” ჟურნალისტი დარხან ომირბეკი, რომელთანაც ადვოკატიც კი არ შეუშვეს.
მასობრივი არეულობისა და საპროტესტო მუხტის ჩასახშობად მთავრობამ ცრემლსადენი გაზის გამოყენებაც გადაწყვიტა, რა დროსაც შსს-ს 95-მა თანამშრომელმა სხეულის დაზიანებაც მიიღო.
ამ დროისთვის ქვეყნის რამდენიმე ოლქში ხელისუფლებამ საგანგებო მდგომარეობა უკვე გამოაცხადა. მათ შორის სულ რამდენიმე საათის წინ პრეზიდენტ კასიმ-ჟომარტ ტოკაევის გადაწყვეტილებით, საგანგებო მდგომაროება გამოცხადდა ერთ-ერთ ყველაზე დიდ – ალმატის ოლქში, რომელიც 19 იანვრამდე გაგრძელდება.
კომენტარები