საქართველოს ყოფილი პრეზიდენტი, მიხეილ სააკაშვილი პარლამენტში დროებითი საგამოძიებო კომისიის შექმნის ინიციატივით გამოდის. ამის შესახებ მისმა ადვოკატმა, გიორგი მშვენიერაძემ რუსთავის ციხის დატოვების შემდეგ განაცხადა. სააკაშვილი ითხოვს, ოპოზიციონერმა დეპუტატებმა კომისიის შექმნის საკითხი დააყენონ. კომისიამ უნდა შეისწავლოს წამების და არაადამიანური მოპყრობის ფაქტები, რომელიც სააკაშვილის მიმართ განხორციელდა.
“მიხეილ სააკაშვილი ფიქრობს, რომ სახელმწიფო ინსპექტორის სამსახურის დაჩქარებულად გაუქმება პირდაპირ დაკავშირებულია მისი საქმის გამოძიებასთან. საგამოძიებო მოქმედებები მიმდინარეობდა ინტენსიურად, მათ შორის, მისი გამოკითხვა შედგა საკმაოდ დეტალურად. ფიქრობს, რომ სწორედ ამიტომ გადადგა ხელისუფლებამ ნაბიჯი, რომ შეანელოს გამოძიების პროცესი.
მიხეილ სააკაშვილი ფიქრობს, რომ მნიშვნელოვანი იქნება, მის საქმეზე შეიქმნას პარლამენტში დროებითი საგამოძიებო კომისია, რომელიც შეისწავლის მის მიმართ არაადამიანური და ღირსებისშემლახავი მოპყრობის ფაქტს და მათ შორის იმ თანამდებობის პირთა პასუხისმგებლობის საკითხს დააყენებს, რომლებიც ამ პროცესში იყვნენ ჩართულები”,- აღნიშნა გიორგი მშვენიერაძემ.
კომენტარები