პიროტექნიკის გამოყენების შედეგად, ოთხმა მოზარდმა კიდურები დაკარგა

დამწვრობის ცენტრის ხელმძღვანელის, გუგა ქაშიბაძის განცხადებით, დამწვრობის ცენტრში პირველი იანვრიდან დღემდე, პიროტექნკით დაზიანებული 30-მდე პაციენტი შეიყვანეს, მათგან ორის, 8 და 9 წლის ბავშვების მდგომარეობა შედარებით სერიოზული იყო და ამ დრომდე სტაციონარში რჩებიან.

„ახალი წლის დადგომიდან დღემდე ჩვენთან სულ 30 პაციენტი შემოვიდა. 2 მათგანი სტაციონარში მოთავსდა, დანარჩენი ამბულატორიაში გაეწერა. სტაციონარში მტევნებისა და სახის დაზიანებით 8 და 9 წლის ბავშვები წვანან. მათი მდგომროება სტაბილურია“, – განაცხადა ქაშიბაძემ.

რაც შეეხება იაშვილის ბავშვთა ცენტრალურ საავადმყოფოს, აქ 4 მოზარდი იმყოფება, რომელთაც კიდურების ამპუტაცია დასჭირდათ. მ.იაშვილის სახელობის ბავშვთა ცენტრალური საავადმყოფოს ორთოპედ-ტრავმატოლოგის, პროფესორ ბიძინა კანაშვილის თქმით, ასაფეთქებელი მოწყობილობის აფეთქებამ თითის დაკარგვა ადგილზევე გამოიწვია.

„ჩვენს კლინიკაში არის 4 ბავშვი, ოთხივე მათგანი არის კიდურის მძიმე დაზიანებით, ამიტომ მოხდა მათი დაყოვნება. რაც შეეხება 2 ბავშვს, აღენიშნებოდა მსუბუქი დაზიანებები და უკვე გაწერილები არიან კლინიკიდან. ამ 4 ბავშვიდან ოთხივეს ადგილზე მოუვიდათ ეს ამპუტაცია, ასაფეთქებელი მოწყობილობის გახეთქვის გამო“. – აცხადებს ბიძინა კანაშვილი.

წყარო: პრაიმტაიმი