ჩეხეთის მთავრობის გადაწყვეტილებით, ქვეყანაში სახელმწიფოს, სამინისტროებისა და უწყებების ხელმძღვანელების, ასევე მაღალჩინოსნების ხელფასები ერთი წლით გაიყინება. სამაგიეროდ, ამის ხარჯზე, გაიზრდება მედიკოსების, პედაგოგებისა და უნივერსიტეტის პროფესორების, სოციალური მუშაკების, სამხედრო მოსამსახურეების, პოლიციელებისა და მეხანძრეების ხელფასები. ინფორმაციას ადგილობრივი მედია ავრცელებს.
“მთავრობამ მიიღო გადაწყვეტილება, 1 იანვრიდან სახელმწიფოს, სამინისტროებისა და უწყებების ხელმძღვანელებს, ასევე თანამდებობის პირებს ხელფასები ერთი წლით გაუყინოს. ამასთან, ექიმებს, სოციალურ მუშაკებს, მასწავლებლებს და სამხედრო მოსამსახურეებს ხელფასები გაეზრდებათ”, – განაცხადა ჩეხეთის პრემიერ-მინისტრმა, პეტრ ფიალამ.
მისი თქმით, ექიმების, მასწავლებლებისა და სოციალური მუშაკების ხელფასები 2%-დან 6%-მდე გაიზრდება. მეხანძრეების, პოლიციელებისა და სამხედრო მოსამსახურეების ყოველთვიური ხელფასი 700 კრონით (დაახლოებით 27 ევრო) მოიმატებს. მინისტრთა კაბინეტის გადაწყვეტილება პარლამენტმა უნდა დაამტკიცოს, რომლის მოადგილეებსაც 2022 წელს ხელფასი უნდა გაეყინოთ.
იმავდროულად, სახელმწიფო ორგანოებისა და ორგანიზაციების პროფკავშირმა მთავრობის გადაწყვეტილება მისი წევრებისთვის ხელფასების გაყინვის შესახებ დაგმო. პროფკავშირის ლიდერების თქმით, ეს ათიათასობით საჯარო მოხელესა და მუნიციპალიტეტების თანამშრომელს შეეხება. მათი აზრით, ქვეყანაში ინფლაციის დაჩქარებული ზრდისა და საცალო ფასების სწრაფი ზრდის გამო, მათი რეალური შემოსავლები სერიოზულად შემცირდება.
კომენტარები