დეპუტატი, “მოქალაქეების” წევრი, ლევან იოსელიანი:
“სახელმწიფო ინსპექტორის ინსტიტუტის არსებობა არის ძალიან მნიშვნელოვანი და ჩვენი პარტია, “მოქალაქეები” მის გაუქმებას მხარს არ დაუჭერს.
ამ სამსახურის დამოუკიდებლობასა და მიუკერძოებლობას დადებითად აფასებენ, როგორც არასამთავრობო სექტორი, ასევე საერთაშორისო პარტნიორები.
მართალია, სამსახურის შექმნის პროცესში გარკვეული საფრთხე არსებობდა, რომ გამოძიების და ინფორმაციის დამუშავების კანონიერების კონტროლის ფუნქციების ერთ უწყებაში მოქცევა, შესაძლოა, ეფექტიანი არ ყოფილიყო. თუმცა, პრაქტიკაში ხარვეზი არ დაფიქსირებულა. სახელმწიფო ინსპექტორის სამსახურში საგამოძიებო მიმართულება ჩამოყალიბებულია ცალკე დეპარტამენტის სახით, ინსპექტორს მხოლოდ გამოძიების წარმოების უფლება მიეცა და მასზე საპროცესო ზედამხედველობის უფლება საქართველოს პროკურატურამ სრულად შეინარჩუნა.
დღეს ნაცვლად იმისა რომ განხორციელდეს ქმედებები სამსახურის შემდგომი გაძლიერების კუთხით, რადგან თუნდაც სამართალდამცავთა მიერ ჩადენილი დანაშაულის ეფექტიანი გამოძიება ჩვენი ქვეყნისთვის მნიშვნელოვანი გამოწვევაა, ვხედავთ ინსპექტორის სამსახურის გაუქმების სურვილს, რის უკანაც ნათლად შეგვიძლია დავინახოთ პოლიტიკურ ანგარიშსწორების ნიშნები. ამას ადასტურებს ისიც, რომ წარმოდგენილ კანონპროექტი მომზადებაში ჩართულები არ იყვნენ არც უშუალოდ სამსახურის წარმომადგენლები, არც სამოქალაქო საზოგადოების ორგანიზაციები და არც სხვა დაინტერესებული მხარეები. გარდა ამასა, დაუშვებელია ასეთი მაღალი საჯარო ინტერესის მქონე საკითხთან დაკავშირებული კანონპროექტის განხილვა მოხდეს დაჩქარებული წესით. ეს გამორიცხავს შესაძლებლობას საკითხზე მოხდეს სიღრმისეული მსჯელობა, ყველა დაინტერესებული მხარის ჩართულობით.
ის ფაქტი, რომ ინსპექტორის სამსახურის საქმიანობა საგამოძიებო კუთხით განსაკუთრებით მნიშვნელოვანია ცხადყოფს ციფრებიც, 2020 წელს სახელმწიფო ინსპექტორის სამსახურის საგამოძიებო დეპარტამენტში შევიდა 2622 შეტყობინება. 2020 წელს სახელმწიფო ინსპექტორის სამსახურის საგამოძიებო დეპარტამენტში გამოძიება დაიწყო 270 სისხლის სამართლის საქმეზე.
საინტერესოა, რომ პარლამენტს 2020 წლის სახელმწიფო ინსპექტორის ანგარიშისთვისაც არ მოუსმენია, რისი ვალდებულებაც მას საქართველოს პარლამენტის რეგლამენტის შესაბამისად აქვს.”
კომენტარები