გამოვაცხადოთ მორატორიუმი პოლიტიკურად მოტივირებულ საქმეებზე, – ამის შესახებ საქართველოს მეოთხე პრეზიდენტმა გიორგი მარგველაშვილმა გორის ჰოსპიტალში მიხეილ სააკაშვილთან შეხვედრის შემდეგ განაცხადა.
მისი თქმით, შექმნილ გეოპოლიტიკურ ვითარებაში საქართველოს წინაშე არსებულ გამოწვევებზე უნდა გაიმართოს სამი პრეზიდენტის შეხვედრა.
“ჩვენ კიდევ ერთხელ გამოვხატეთ მზაობა და მოწონება იმისა, რომ ბუნებრივად, როდესაც ჩვენ ვლაპარაკობთ ახალი ფურცლის გადაშლაზე, ახალი ტრადიციის შექმნაზე, ახალი გამოწვევების მზადყოფნაზე, ბუნებრივი იქნებოდა, რომ ჩვენ აუცილებლად ჩავატაროთ სამი პრეზიდენტის ფორმატი. იმ განსხვავებულობების მიუხედავად, რა დამოკიდებულებებიც გვაქვს სამივეს ერთმანეთის მიმართ, ქართველ ხალხს გაუგზავნოს გზავნილი, რომ საერთო მტრის წინააღმდეგ ჩვენ ყოველთვის ვერთიანდებოდით და დღესაც ვიქნებით გაერთიანებული. მიუხედავად იმისა, რომ შევინარჩუნებთ განსხვავებულობებს და შევინარჩუნებთ, შესაძლოა, სხვადასხვა პოლიტიკურ პრეფერენციებს.
ამის პარალელურად მინდა პირადად აღვნიშნო, რომ მიმაჩნია სწორად, რომ ასეთ კონტექსტში, ვართ რა გადაფასებისა და გადააზრების პროცესში, გადავწყვიტოთ, რომ პოლიტიკური მორატორიუმი გამოვაცხადოთ პოლიტიკურად მოტივირებულ, ჩვენი შეფასებით, საქმეებზე სასამართლოში – ეს საქმეებია სააკაშვილის, ხაზარაძის, მელიას, გვარამიას საქმეები, რაც მიიჩნევა მოტივირებულად.
ეს არ ნიშნავს, რომ ჩვენ ვამბობთ, რომ ისინი არიან დამნაშავეები ან უდანაშაულოები, ეს ნიშნავს, რომ ჩვენ ამ პროცესს გარკვეულწილად ვაჩერებთ”, – განაცხადა მარგველაშვილმა.
კომენტარები