მოძრაობის „ძალა ერთობაშია“ ლიდერი დავით ქაცარავა, ოკუპაციის ხაზთან მცხოვრებ ვალია ბებოზე სოციალურ ქსელში ემოციურ სტატუსს აქვეყნებს.
“დღეს ვალია ბებოსთან ვიყავით ჩასულები. ვინც არ იცის, ვალია ბებო, დათა პაპას მეუღლეა, იმ დათა პაპასი, რომელმაც თავისი ომი რუსებთან გამარჯვებით დაასრულა. რაში მდგომარეობს დათა პაპას გამარჯვება? 2008 წლის შემდეგ რუსულმა საოკუპაციო რეჟიმმა ყველაფერი გააკეთა იმისათვის, რომ დათა პაპას და ვალია ბებოს მიეტოვებინა საკუთარი სახლი და გამოქცეულიყო საქართველოს არაოკუპირებულ ნაწილში..
ფსიქოლოგიური და ფიზიკური ზეწოლის მიუხედავად, დათა პაპა ბოლომდე დარჩა საკუთარ სახლში და მსოფლიოს გააცნო ხურვალეთი და ჩვენი ქვეყნის უდიდესი პრობლემა, რასაც საქართველოს ოკუპაცია ჰქვია.
დათა პაპას გარდაცვალების შემდეგ, ვალია ბებო უკანასკნელ მეციხოვნედ იქცა… სიკვდილის წინ დათა პაპამ უთხრა – არ წახვიდე აქედან, არ მიატოვო სახლი, ქართველები დაგეხმარებიან..ეს იყო მისი უკანასკნელი სიტყვები.
მას მერე ვალია ბებო ფაქტობრივად მარტო დარჩა. უკვე რამდენიმე თვეა, საოკუპაციო რეჟიმი მასთან აღარ უშვებს არც შვილს და არც შვილიშვილს….
ოკუპანტები ეხლა ვალია ბებოს გატეხვას ცდილობენ, დღეს ჩასულებმა აღმოვაჩინეთ, რომ ზუსტად იმ ადგილას, საიდანაც ვალია ბებოს პროდუქტს ვაწვდით, ორკებმა მოძრაობის დეტექტორები დააყენეს…
ვალია ბებოს მაინც არ ეშინია, მაგრამ მას ჩვენი მხარდაჭერა ესაჭიროება! მეგობრებო! ჩადით მასთან ხშირად, მოინახულეთ, გაიზიარეთ მისი გასაჭირი და მისი ბრძოლის თანაზიარი გახდით!ძალა ერთობაშია! ბრძოლას ყოველთვის აქვს აზრი!- წერს დავით ქაცარავა.
კომენტარები