მესტიის მუნიციპალიტეტში მოსახლეობა ელექტროენერგიის გრაფიკით მიწოდებას აპროტესტებს. როგორც ადგილობრივები ამბობენ, დენზე შექმნილი პრობლემა მუნიციპალიტეტში დამონტაჟებული მაინერების სიმრავლეს უკავშირდება.
მოსახლეობის ნაწილი ამბობს, რომ მაინერების მეპატრონეები ხელისუფლებასთან დაახლოებული პირები არიან და სწორედ ამიტომ არ ხდება უკანონოდ დამონტაჟებული მოწყობილობების ამოღება.
კომპანია “ენერგო-პრო-ჯორჯიას” განმარტებით, მოსახლეობის საყოფაცხოვრებო მოხმარებისთვის, მუნიციპალიტეტის მასშტაბით, საჭიროა 7 მეგავატი ელექტროენერგია. მესტია კი მაინერების გამო 27 მეგავატამდე ელექტროენერგიას მოიხმარს, რის გამოც ელექტროგადამცემი ხაზები დატვირთვს ვერ უძლებს.
პრობლემას ადასტურებენ მესტიის მერიაშიც. მერი კაპიტონ ჟორჟოლიანი ამბობს, რომ კანონი არ აძლევს შესაძლებლობას, მოწყობილებების ამოსაღებად შესაბამისი ნაბიჯები გადადგას.
“ვინც ჩემ წინააღმდეგ არიან, იმათ აქვთ ის [მაინერები]. კანონი არ მიშვებს და მუშაობენ იმაზე, რომ კანონი მიიღონ და შესაძლებელი გახდეს მაგის ამოღება. თუ ჩვენი მოსახლეობა მიხვდება იმას, რომ მაინერი უნდა გამოვრთოთდა ვიქნებით სითბოში, ყველაფერი კარგად იქნება, თუ არა და მიიღებენ ზომებს და ამოიღებენ მაინერებს”, – თქვა ჟორჟოლიანმა.
კითხვას, თავად რას აკეთებს პრობლემის მოსაგვარებლად, ჟორჟოლიანმა ასე უპასუხა: “მე ლობიოს ვხარშავ. რას ვაკეთებ და 24 საათი ვმუშაობ ხალხთან რომ ეს მაინერები გამორთონ. [შედეგი რომ მაინც არ არის?] იმიტომ რომ თქვენნაირები გვიშლიან ხელს”.
ამასთან, ადგილობრივები ამბობენ, რომ ერთ-ერთ ყველაზე მოთხოვნად ტურისტულ რეგიონს, ენერგოკრიზისი ემუქრება, რასაც შესაძლოა, ტურისტული სეზონის ჩავარდნაც მოჰყვეს. პარალელურად პრობლემები ექმნებათ მოსწავლეებსა და სტუდენტებს.
კომენტარები