მერიის გადაწყვეტილებას საზოგადოებრივი ტრანსპორტით მგზავრობისათვის სააბონენტო სისტემის შემოღების შესახებ, სოციალურ ქსელში ეხმაურება ჟურნალისტი დავით პაიჭაძე.
პაიჭაძე ამბობს, რომ აღნიშნული გადაწყვეტილებით, მოქალაქეებისათვის ტრანსპორტით სარგებლობა გაძვირდება.
„ერთი რამე მაინც ვერ გავიგე ბოლომდე:
მერია აძვირებს საქალაქო ტრანსპორტით მგზავრობას. ხომ შეიძლება გამოხვიდე და ასეც თქვა, ტრანსპორტს ვაძვირებთ (ტრანსპორტი ძვირდება), ადამიანებს აუხსნა, რატომ, მოიყვანო ნამდვილი არგუმენტები, მიიღო ცოტათი მაინც შეწუხებული სახე და შეეცადო იყო ამ დროს გულწრფელი.
რას მიმტკიცებ, რომ ერთჯერადი მგზავრობის ორჯერ გაძვირება გაიაფებაა? ნუთუ არ სჯობს, არც მე ჩამთვალო დებილად, არც თავი მოიდებილო, არც თაღლითად გამოჩნდე და არც ადამიანები ატყუო საჯაროდ?
შეკაცო, კრიმინალის ზრდას გაგებით მოეკიდეთო, ხალხს უთხარით და მოეკიდნენ და ტრანსპორტის გაძვირებაში ვერ გაგიგებენ?“ – წერს დავით პაიჭაძე.
ცნობისათვის, ქალაქის მერიის გადაწყვეტილებით, 1 თებერვლიდან ძალაში შედის ახალი სააბონენტო სისტემა, რომლის მიხედვითაც ნებისმიერი საზოგადოებრივი ტრანსპორტით მგზავრობის საათნახევრიანი აბონემენტი 1 ლარი ეღირება, ერთდღიანი – 3 ლარი, ერთთვიანი- 40 ლარი, ექვსთვიანი – 150 ლარი, ერთწლიანი – 250 ლარი.
კომენტარები