“გამოიკვეთა ნეიროპათია – იატაკს ვერ გრძნობს, შესაბამისად, უჭირს გადაადგილება” – ექიმი მიხეილ სააკაშვილზე

პატიმრობაში მყოფი საქართველოს მესამე პრეზიდენტის ჯანმრთელობის მდგომარეობა ისევ მძიმეა. მიხეილ სააკაშვილი გვიან ღამით პირადმა ექიმმა, ნიკოლოზ ყიფშიძემ და ალტერნატიული კონსილიუმის ნევროლოგმა, ოთარ თოიძემ მოინახულეს.

როგორც თოიძემ აღნიშნა, გამოიკვეთა პერიფერიული ნერვული სისტემის დაზიანების ნიშნები, რაც იმაში გამოიხატება, რომ მესამე პრეზიდენტი იატაკს ვერ გრძნობს და შესაბამისად, გადაადგილება უჭირს.

“ვერნიკეს ენცეფალოპათია კლინიკურ სურათში ისევ წამყვანია. სულ ვშიშობთ, არ მოხდეს მისი გადაზრდა კორსაკოვის სინდრომში, რომელიც არის საკმაოდ სერიოზული დაავადება. გამოიკვეთა ნეიროპათია, ანუ პერიფერიული ნერვული სისტემის დაზიანების ნიშნები, რაც გამოიხატება იმაში, რომ ვერ გრძნობს იატაკს, უჭირს შესაბამისად გადაადგილება. ნათხემის დისფუნქციასთან ერთად არის კიდევ, რომ ვერ გრძნობს, მთელი რიგი მგრძნობელობები მოშლილი აქვს და იმ სეგმენტში, სადაც ეს მოშლილობები აღენიშნება, აქვს გამონაყარი, რომელიც ჯერჯერობით ვფიქრობთ, რომ ეს არის ნეიროდერმიტი”, – თქვა ოთარ თოიძემ.