„ფინანსური წახალისების მექანიზმი ეფექტური აღმოჩნდა“ – აქციის ფარგლებში პირველი აცრა 100 000-ზე მეტმა ადამიანმა ჩაიტარა

ჯანდაცვის მინისტრის მოადგილის, თამარ გაბუნიას განცხადებით, 60 წელს ზემოთ ასაკობრივ კატეგორიაში ფინანსური წახალისების მექანიზმი საკმაოდ ეფექტური აღმოჩნდა და ამ აქციის ფარგლებში პირველი აცრა უკვე 100 000-ზე მეტმა ადამიანმა ჩაიტარა.

„საკოორდინაციო საბჭოს მთავარი თემა იყო მზადება „ომიკრონის“ მოსალოდნელი გავრცელების პრევენციისთვის და ჯანდაცვის სისტემის მზაობა. დღევანდელი მდგომარეობით, სამედიცინო სექტორში მობილიზებული რჩება 9112 საწოლი. კლინიკაში იმყოფება 5 488 პაციენტი, თავისუფალია 3227 საწოლი. ბუნებრივია, მობილიზებულები ვართ, რადგან „ომიკრონის“ გავრცელებასთან ერთად კვლავაც მოსალოდნელია შემთხვევების მატება და საწოლებზე მოთხოვნის გაზრდა. ვაქცინაციის პროცესი აქტიურად გრძელდება. კარგია, 60 წელს ზემოთ ასაკობრივ კატეგორიაში ფინანსური წახალისების მექანიზმი საკმაოდ ეფექტური აღმოჩნდა. ამ აქციის ფარგლებში პირველი აცრა უკვე 100 000-ზე მეტმა ადამიანმა ჩაიტარა და ეს პროცესი გაგრძელდება წლის ბოლომდე“, – აცხადებს თამარ გაბუნია.