საერთო ეროვნული შერიგების თემას, რომლის ინიციატორი პრეზიდენტი სალომე ზურაბიშვილია, სოციალურ ქსელში ეხმიანება “ტაბულას” დამფუძნებელი თამარ ჩერგოლეიშვილი.
“ვითარების ნორმალიზაცია ნამდვილად მნიშვნელოვანია. მაგრამ ამის უნარი აქვს მხოლოდ მმართველ ძალას. სალომე ზურაბიშვილი არ განასახიერებს მმართველ ძალას. მმართველი ძალა არის ბიძინა ივანიშვილი.
ივანიშვილის ერთი საცეცი დემოკრატიული პროცესის იმიტაციას ცდილობს. ივანიშვილის მეორე საცეცი ოპონენტების განადგურებაზე საუბრობს. მე ძალიან კარგად მესმის დაბნეული პოლიტიკური კლასის სურვილი რაღაც პროცესის ნაწილებად იქცნენ და ამით რელევანტურობა შეიძინონ. მაგრამ ასეთ თვითინტერესს, დიდი შანსია, საქართველოს ეროვნული ინტერესი გადაყვეს და მხოლოდ ივანიშვილის ძალაუფლების გამტკიცებას მოემსახუროს.
“ადამიანის თვითგადარჩენის მოქმედების სტრუქტურის მექანიზმებს”, ივანიშვილიც ხვდება, ამოვხსენიო – ხომ გვითხრა კიდეც. არ სჭირდება ამის მიხვედრას, რომ ბოროტი გენიოსი იყო – ზედაპირზე დევს პოლიტიკოსების სასოწარკვეთა. ივანიშვილიც ხვდება, რომ ოპოზიციონერ პოლიტიკოსებსაც სჭირდებათ რაღაც პროცესის ნაწილი იყვნენ და როცა თავად ვერ ქმნიან, თავისუფლად შეუძლია სალომე ზურაბიშვილს შეაქმნევინოს. მითუმეტეს, რომ პროცესის იმიტაცია ივანიშვილსაც სჭირდება – ასე დასავლეთის ისედაც სუსტ წნეხს მთლიანად გაანეიტრალებს.
ამიტომ ფრთხილად იყავით, ყველი კარგია მაგრამ დაფიქრდით, სათაგურში ხომ არ დევს.“ – წერს ჩერგოლეიშვილი.
კომენტარები