გიორგი მარგველაშვილის სურვილს შეხვდეს და ესაუბროს მიხეილ სააკაშვილს, საქართველოს მესამე პრეზიდენტი სოციალურ ქსელში გამოეხმაურა:
“მადლობელი ვარ გიორგი მარგველაშვილის მიერ დაკავებული პროაქტიული პოზიციისთვის და მზად ვარ შევხვდე მას ნებისმიერ დროს კრიზისის დაძლევის გზებზე და ჩვენი ქვეყნის მომავალზე სასაუბროდ.
მოვუწოდებ ხელისუფლებას დაბრკოლება არ შეუქმნას საქართველოს მეოთხე პრეზიდენტს. ასევე მივესალმები “ნაციონალური მოძრაობის” ლიდერების მიერ დიალოგის დაწყებას პრეზიდენტ ზურაბიშვილთან.” ნათქვამია მიხეილ სააკაშვილის განცხადებაში.
შეგახსენებთ, რომ საქართველოს მეოთხე პრეზიდენტი, გიორგი მარგველაშვილი მესამე პრეზდიენტთან, მიხეილ სააკაშვილთან შეხვედრას ითხოვს. მისი თქმით, ის შესაბამის უწყებას შეხვედრის მოთხოვნით ოფიციალურად დღეს მიმართავს.
“გადაწყვეტილი მაქვს, რომ შევხვდები საქართველოს მესამე პრეზიდენტს და დღეს ოფიციალურად მივმართავ შესაბამის უწყებებს, მომცენ შესაძლებლობა ბატონ მიხეილ სააკაშვილთან შეხვედრის” – თქვა გიორგი მარგველაშვილმა “მთავარ არხთან”.
ამასთან, გიორგი მარგველაშვილი ადასტურებს, რომ ქვეყნის მოქმედ პრეზიდენტს, სალომე ზურაბიშვილს შეხვდა. მისი თქმით, პრეზიდენტთან შეხვედრისას საუბარი იყო პროცესზე, რომელიც თავად სალომე ზურაბიშვილის ინიციატივით დაიწყო. მარგველაშვილის შეფასებით, შეთანხმებასთან დაკავშირებით, მოქმედი პრეზიდენტის პოზიცია დროული და ადეკვატურია.
კომენტარები