როცა გცემენ, გდევნიან, გიჭერენ, გკლავენ, გაღარიბებენ, არჩევნებს გიყალბებენ და თან გეუბნებიან შევრიგდეთო, ზუსტად ისეთივე ამაზრზენია – ნიკა ქავთარაძე

ორბელიანების სასახლეში გამართულ საახალწლო მიღებას, ტელეკომპანია “ფორმულას” წამყვანი, მსახიობი ნიკოლოზ ქავთარაძე სოციალურ ქსელში ეხმაურება:

“ბავშვობაში მაქვს ნანახი ერთი ძალიან შოკისმომგვრელი ამბავი.

ციხიდან გამოსული ორი ახალგაზრდა შეხვდა ერთმანეთს ჩემს უბანში. როგორც აღმოჩნდა, ციხეში რაღაც მოხდა და მაგის გასარჩევად.

ხოდა, წავიდა საუბარი, გარჩევა, რომელიც გადაიზარდა დაძაბულობასა და ყვირილში. ერთ-ერთმა უცებ სახეში გაარტყა მეორეს, ძალიან, ძალიან მაგრად. მერე ისევ, და კიდევ ერთხელაც. ხოდა, ცხვირიდან სისხლი წამოუვიდა იმ მეორეს. ამან ჯიბიდან ამოიღო ცხვირსახოცი და მიაწოდა – მოიწმინდეო. იმანაც მოიწმინდა და დაუბრუნა. დაუბრუნა თუ არა, ამან ისევ დაარტყა რამდენჯერმე და მერე ისევ მზრუნველად გაუწოდა ცხვირსახოცი და პლიუს წყალიც. იმანაც მოიწმინდა და ისევ დაუწყო ამან ცემა.

მოკლედ ასე გაგრძელდა ალბათ 20-25 წუთი. თან სცემდა და თან ზრუნავდა. წარმოუდგენელ შოკში ჩავვარდი. ასეთი საშინელი სანახაობა არასდროს მინახავს.

ხოდა, გუშინდელ, სალომე ზურაბიშვილთან შემდგარ შერიგების შეხვედრაზე გამახსენდა – როცა გცემენ, გდევნიან, გიჭერენ, გკლავენ, გაღარიბებენ, არჩევნებს გიყალბებენ და თან გეუბნებიან შევრიგდეთო, ზუსტად ისეთივე ამაზრზენია, როგორც ის ამბავი ჩემი ბავშვობიდან”, – წერს ქავთარაძე.