„ამ არჩევნების შედეგად ყველაფერი იქნება ხარისხიანი“ – ვინ დააფინანსა წალენჯიხის ნაძვის ხე?

წალენჯიხის ცენტრში ნაძვის ხე აინთო. როგორც მერმა, გია ხარჩილავამ აღნიშნა, მას სარეზერვო ფონდში მხოლოდ სამასი ლარი დახვდა.

„არ იყო ნაფიქრი ქალაქის ახალ განათებებზე, ახალ მოწყობაზე და თუნდაც კონცერტზე. წალენჯიხა არაა მარტო და მეგობართა კლუბი ზრუნავს ამ მოედნისა და ნაძვის ხის მოწყობაზე. გადავდივართ უკვე მოლოდინებისა და მოლოცვის რეჟიმში და მოსახლეობას ვეუბნები, რომ ამ არჩევნების შედეგად ყველაფერი იქნება ხარისხიანი. ჩვენ გამოვდივართ ელიავას ხარისხიდან და ახალ ხარისხებს, ახალ სერვისებს ვთავაზობთ ჩვენს ქალაქსა და მუნიციპალიტეტს”,- აღნიშნა მან.

წალენჯიხის ბიუჯეტი 18 მილიონ ლარს აჭარბებს. ჯერ-ჯერობით ბიუჯეტი არ დამტკიცებულა და საკრებულოს თავმჯდომარე არ აურჩევიათ. საკითხი პარასკევს უნდა გადაწყდეს, სხდომაზე.

როგორც „პრაიმტაიმთან“ საუბრისას გია ხარჩილავამ განაცხადა, ნაძვის ხის დადგმაში მონაწილეობა კომპანია „კოკა-კოლამაც“ მიიღო.

„ნაძვის ხეზე ლოგო რასაკვირველია, ნიშნავს მონაწილეობას. სოციალურ ქსელში თუ გვადევნებთ თვალს, გამოჩნდება ყველაფერი… მეგობართა კლუბში ბევრი ადამიანია გაწევრებული“.

პრაიმტაიმი