პარიზის სააპელაციო სასამართლომ, ნიკოლა სარკოზის უახლოეს თანამებრძოლს და საფრანგეთის შინაგან საქმეთა ყოფილ მინისტრს კლოდ გეანს 2-წლიანი პატიმრობა მიუსაჯა. აქედან ერთ წელს ის ციხეში გაატარებს, – იუწყება BFMTV.
სასამართლომ გეანს დააკისრა ასევე 75 ათასი ევროს ოდენობის ჯარიმის გადახდა და აუკრძალა მას ხუთი წლით საჯარო თანამდებობის დაკავება.
ყოფილი ჩინოვნიკის წინააღმდეგ საქმე 2013 წელს აღიძრა. მაშინ გაირკვა, რომ გეანი, რომელიც 2002-2004 წლებში საფრანგეთის შინაგან საქმეთა სამინისტროს კანცელარიის უფროსი იყო, ყოველთვიურად უწყების სპეციალური ფონდის ბიუჯეტიდან 10 ათას ევროს იღებდა. თანხის ნაწილს თავისთვის იტოვებდაა, ნაწილს კი სქემაში ჩართულ სამ ადამიანს უნაწილებდა. მთლიანობაში, გეანს 210 ათასი ევროს მოცულობის ფინანსურ დარღვევებში ადანაშაულებენ.
სასამართლო პროცესებზე კლოდ გეანი ბრალს არ აღიარებდა და ამბობდა, რომ ეს თანხა მას პრემიის სახით ეკუთვნოდა.
2016 წლის 15 ნოემბერს, ლიბიელმა ბიზნესმენმა ზიად ტაკედინმა განაცხადა, რომ 2006-2007 წლებში პირადად მონაწილეობდა ნიკოლა სარკოზისთვის და კლოდ გეანისთვის რამდენიმე ხელჩანთის გადაცემაში, რომელთაგან თითოეულში 5 მილიონი ევრო იყო. ამ დროს სარკოზი შინაგან საქმეთა მინისტრი გახლდათ. ბიზნესმენი ამტკიცებდა, რომ ფული სარკოზის ლიბიის ლიდერმა მუამარ კადაფიმ საპრეზდენტო კამპანიისთვის გამოუგზავნა. გეანის ადვოკატებმა ყველა ბრალდება უარყვეს, ხოლო სარკოზის იურისტები ბიზნესმენს სასამართლოში ჩივილით დაემუქრნენ.
2014 წლის იანვარში ტელეკომპანია France 3 TV-მ გამოქვეყნა მუამარ კადაფის 2011 წლის ინტერვიუ, სადაც ლიბიის ლიდერი ამტკიცებს, რომ სარკოზიმ მას მინისტრობის დროს ფინანსური დახმარება სთხოვა, თუმცა თანხის ოდენობა არ დაუსახელებია.
კლოდ გეანი სარკოზის 2007 წლის საპრეზიდენტო კამპანიას ხელმძღვანელობდა. 2015 წლის 8 მარტს, ის კამპანიის უკანონო დაფინანსებაში დაადანაშაულეს.
კომენტარები