“ზვიადაურს ეს რეაგირება რომ არ მოეხდინა, არც მე ვიდგებოდი აქ, არც ზურა იქნებოდა ცოცხალი” – წინანდლის ტყეში მომხდარი დაპირისპირების მონაწილე

წინანდლის ტყეში მომხდარ მკვლელობაში ბრალდებული სპორტსმენის, ზურაბ ზვიადაურის საქმეზე თელავის რაიონულმა სასამართლომ ნაფიც მსაჯულთა შერჩევა დაიწყო.

დღევანდელ სასამართლო პროცესზე ტექნიკურ საკითხებზე იმსჯელეს, ნაფიც მსაჯულთა შერჩევა კი 2022 წლის 21 იანვრიდან განახლდება.

რაც შეეხება წინანდლის ტყეში მომხდარ დაპირისპირებაში მონაწილე კიდევ ერთ პირს, ჯაბა ჯანგირაშვილს, მისი საქმე ცალკე წარმოებად გამოიყო, ვინაიდან მის საქმეს, ბრალიდან გამომდინარე, ნაფიცი მსაკულები ვერ განიხილავენ.

ჯანგირაშვილმა სასამართლო პროცესის დასრულების შემდეგ ჟურნალისტებთან კომენტარი გააკეთა და აღნიშნა, რომ კონფლიქტი სამშენებლო ობიექტზე დაიწყო და რომ ზვიადაურებს მომხდართან კავშირი არ აქვთ. ბრალდებულის თქმით, დაპირისპირების დროს ადგილზე ჯერ ზვიად ზვიადაური მივიდა, შემდეგ კი – ზურაბ ზვიადაური, რომელმაც მომხდარის დეტალებში გარკვევაც ვერ მოასწრო, რომ სროლა დაიწყო და აუცილებელი მოგერიების ფარგლებში მოქმედებდა.

ზურა შემთხვევით მოვიდა, დამირეკა, სად ხარ, ზვიადს ვურეკავ და არ მპასუხობსო და ვუთხარი სად ვიყავი. მინდა, ყველმა იცოდეს, ზურას, რომ ეს რეაგირება არ გაეკეთებინა, არც მე არ ვიდგებოდი დღეს აქ, არც ზურა იქნებოდა ცოცხალი და ბევრი ადამიანი დაიღუპებოდა. მე მქონდა იარაღი, გაფორმებული მქონდა ტარების უფლებით და მანქანაში მქონდა. ჩვენ მიმართ გამიზნული სროლა იყო, ყველას გვესროდა“, – განაცხადა ჯანგირაშვილმა.

ბრალდებული ზვიადაური მოსამართლე მამუკა წიკლაურმა 50-ათასლარიანი გირაოს სანაცვლოდ გაათავისუფლა. მას საგამოძიებო უწყება განზრახ მკვლელობას ედავება.