„რაც შეეხება ღმერთთან სიახლოვეს, რასთან არის სააკაშვილი ახლოს, ამას კიდევ ერთხელ შეგვახსენებს ყოველ თავის გამოსვლაში სასამართლო პროცესებზე“– ირაკლი კობახიძე

„რაც შეეხება ღმერთთან სიახლოვეს, რასთან არის სააკაშვილი ახლოს, ამას კიდევ ერთხელ შეგვახსენებს ის ყოველ თავის გამოსვლაში სასამართლო პროცესებზე.”– ამის შესახებ “ქართული ოცნების” თავმჯდომარემ, ირაკლი კობახიძემ ჟურნალისტებთან საუბრისას განაცხადა.

“რაც შეეხება შერიგებას, შერიგების საფუძველი არის სინანული და მონანიება, ჩვენ ამის ვერავითარ ნიშანწყალს ვერ ვხედავთ განსაკუთრებით სააკაშვილის გამოსვლებში. უფრო მეტიც, ის ძალიან ხშირად იმუქრება ხოლმე. როდესაც დამნაშავე გემუქრება, ასეთ დროს, ბუნებრივია, შერიგებაზე საუბარი ზედმეტია. მათ უნდა გადახედონ საკუთარ დანაშაულებს, უნდა აღიარონ დანაშაულები, მოინანიონ დანაშაულები, მათ შორის ის უმძიმესი კორუფციული დანაშაული, რაზეც ბოლო პროცესზე იყო საუბარი. ასეთ შემთხვევაში თეორიულად რა თქმა უნდა დასაშვებია ფიქრი რაიმე ტიპის შერიგებაზე, მაგრამ ჩვენ ამის არავითარი იმედი არ გვაქვს.

ოპტიმიზმის არავითარი საფუძველი არ გვაქვს, უბრალოდ, მათ ბუნებაში არ ზის არც სინანული და არც მონანიება. ამას ისინი ელემენტარულად ვერ შეძლებენ. ამის რესურსი რომ ჰქონოდათ, იმ უმძიმეს დანაშაულებსაც არ ჩაიდენდნენ, რაც ჩაიდინეს ცხრა წლის განმავლობაში და შემდეგ მომდევნო 9 წლის განმავლობაში ოპოზიციაში ყოფნის პირობებშიც“, – განაცხადა ირაკლი კობახიძემ.