კორონავირუსის (COVID-19) პანდემიის გამო, ქვეყნებმა მალარიასთან ბრძოლის ძალისხმევა შეასუსტეს, რამაც ავადობისა და სიკვდილიანობის მნიშვნელოვანი ზრდა გამოიწვია. ინფორმაციას UN News ავრცელებს.
ჯანდაცვის მსოფლიო ორგანიზაციის მონაცემებით, 2020 წელს მალარიის 241 მილიონი ახალი შემთხვევა (14 მილიონით მეტი 2019 წელთან შედარებით) დაფიქსირდა. ამ დაავადებით 627 ათასი ადამიანი (69 ათასით მეტი, ვიდრე ერთი წლით ადრე) გარდაიცვალა.
ჯანდაცვის მსოფლიო ორგანიზაციის ექსპერტები ინფიცირებისა და გარდაცვალების დამატებითი შემთხვევების დაახლოებით ორ მესამედს პანდემიასა და მის გამო ჯანდაცვის სფეროში სერვისების მიწოდებაზე დაწესებულ შეზღუდვებს უკავშირებენ.
ამასთან, აღნიშნულია, რომ ჯანმო-ს ყველაზე პესიმისტური პროგნოზები არ დადასტურებულა. მეცნიერები შიშობდნენ, რომ პანდემიამ, შესაძლოა, საჰარის სამხრეთით მდებარე ქვეყნებში მალარიით სიკვდილიანობის გაორმაგება გამოიწვიოს, თუმცა მთავრობებმა ასეთი სცენარის თავიდან ასაცილებლად გადაუდებელი ზომები მიიღეს.
ჯამში, საჰარიდან სამხრეთით მდებარე ქვეყნებზე მალარიის ყველა შემთხვევის 95% და მალარიით სიკვდილიანობის 96% მოდის. 87 ქვეყნიდან, სადაც მალარია ჯერ კიდევ გავრცელებულია, 46-ში გასულ წელს 10000-ზე ნაკლები ინფიცირებული გამოვლინდა. სიკვდილიანობის დაახლოებით 80% ხუთ წლამდე ასაკის ბავშვებზე მოდის.
კომენტარები