“ძალიან სწორად არის შეყვანილი, რა, არ უნდა იყოს?” — ასე უპასუხა ქართული ოცნების დეპუტატმა, ალუდა ღუდუშაურმა ისტორიის სახელმძღვანელოში ყოფილი პრემიერმინისტრის, ბიძინა ივანიშვილის ბიოგრაფიის შეტანაზე დასმულ კითხვას. ღუდუშაურის აზრით, რაც დრო გავა, ივანიშვილს უფრო მეტად ექნება “დაფასებული ადგილი”.
“რომელ არაფორმალურობაზე საუბრობთ, რომელ არაფორმალურ მმართველობაზე საუბრობთ. დიახ, ბიძინა ივანიშვილს საქართველოს სახელმწიფოს ისტორიაში აქვს და რა თქმა უნდა, რაც დრო გავა, კიდევ უფრო მეტად ექნება, დაფასებული ადგილი, განსხვავებით სააკაშვილისგან. კიდევ გეუბნებით, რომ თუ ამ ისტორიის წიგნში რამე არის არასწორი, პირობითად და არ ასახავს რეალობას, ჩემი აზრით, არის ის, რომ ამ ისტორიის სახელმძღვანელოში მიხეილ სააკაშვილის ის “საგმირო საქმეები” არ არის ასახული, რაც მან ჩაიდინა და რისთვისაც არის მსჯავრდებული და რაზეც მიმდინარეობს არაერთი საქმე”, — განაცხადა ღუდუშაურმა.
განათლების სამინისტროს მიერ გრიფირებულ მე-9 კლასელთათვის განკუთვნილ სახელმძღვანელოებში ბიძინა ივანიშვილის ბიორგაფია შეიტანეს. დიოგენესა და ლოგოს პრესის მიერ გამოცემულ წიგნებში მოთხრობილია ივანიშვილის ბიოგრაფია, ის ბიზნესმენად, პოლიტიკოსად, ქველმოქმედათა და მეცენატადაა მოხსენიებული. დადებითადაა შეფასებული 2012 წელს ნაციონალური მოძრაობის დამარცხება და ქართული ოცნების მმართველობაში მოსვლა. ნათქვამია, რომ ხელისუფლების ცვლილების მიუხედავად ევროპული კურსი არათუ შეიცვალა, არამედ, უფრო მეტად გაღრმავდა.
გარდა ამისა, საუბარია ვარდების რევოლუციასა და რუსეთ-საქართველოს ომის პერიოდზე. ორ ქვეყანას შორის კლონფლიქტის განხილვისას მეტი აქცენტი საქართველოსა და კონკრეტულად, ექსპრეზიდენტ მიხეილ სააკაშვილის პასუხისმგებლობაზეა გაკეთებული.
კომენტარები