თბილისის საქალაქო სასამართლოსთან დაკავებულები, ამ დრომდე წინასწარი დაკავების იზოლატორში რჩებიან. დაკავებულებს შორისაა, ბესიკ თამლიანი, რომელიც ადვოკატების ინფორმაციით, ნაცემია.
გუშინ განვითარებულ მოვლენებს არასამთავრობო ორგანიზაციების წარმომადგენლები გამოეხმაურნენ.
“საქართველოს დემოკრატიული ინიციატივის” თავმჯდომარე ედუარდ მარიკაშვილი:
“სასამართლოსთან პოლიცია მოქმედებდა ღია, პირდაპირი აგრესიით როგორც სამოქალაქო აქტივისტების, ასევე მედიის წარმომადგენლების წინააღმდეგ. ძალიან დიდ ნაწილში ისინი ცდებოდნენ უფლებამოსილებას, რამაც გარკვეული ადამიანების ჯანმრთელობის დაზიანებაც გამოიწვია და შეიძლება, ამ ყველაფერს ნაწილობრივ მიეცეს დანაშაულის კვალიფიკაციაც.
რაც შეეხება მოქმედებას ზოგადად პოლიციის, ვხედავთ, რომ ისინი უკვე ღია აგრესიას აწარმოებენ და და ეს არის მათი პირდაპირი დავალება, რომ რაც შეიძლება მეტი ძალის გამოყენებით ჩაკლან პროტესტის მაშინ, როდესაც ისეთი საფრთხეები არ მომდინარეობს, რომ მოხდეს ასეთი ძალის გამოყენება”
ახალგაზრდა იურისტთა ასოციაციის ხელმძღვანელი, ნიკა სიმონიშვილი:
“ჩვენ ვნახეთ, რომ სახელმწიფომ ვერ დაიცვა მედიის უსაფრთხოება, თუმცა მეორეა,რომ სახელმწიფოს წარმომადგენლების ქმედებები არ იყო შესაბამისი ჩვენს კანონმდებლობასთან. არ იყო შესაბამისი სწორედ იმის გამოც, რომ პოლიციელის ქმედებები, მაგალითად როდესაც ისინი ცდილობდნენ ოპერატორების ჩამოყვანას კედლიდან, ის ფეხზე მოქაჩვა არაფერში ჯდებოდა, ამ დროს შეიძლებოდა ჩამოვარდნილიყო ოპერატორი და დაზიანება მიეღო. კიდევ ერთი საკითხია წიწაკის გამოყენება. აქ არის ეუთოს საერთაშორისო სტანდარტები, რომელიც უნდა ყოფილიყო დაცული, თუმცა ეს გუშინ არ მომხდარა”
გუშინ თბილისის საქალაქო სასამართლოსთან მესამე პრეზიდენტის, მიხეილ სააკაშვილის მხარდასაჭერად პოლიტიკოსები, სამოქალაქო აქტივისტები და რიგითი მოქალაქეები შეიკრიბნენ. აქციაზე ვითარება რამდენჯერმე დაიძაბა, იყო დაპირისპირება სამართალდამცავებსა და აქტივისტებს შორის. პოლიციამ მოქალაქეების წინააღმდეგ წიწაკის სპრეიც გამოიყენა.
შსს-მ ჯამში 15 პირი დააკავა, მათ შორისაა გიგი უგულავა და ბესიკ თამლიანი.
კომენტარები