“მეც დამიშავა, მეც გამომაცხადა ქვეყნის მტრად…” – ბურჭულაძე

პაატა ბურჭულაძე, რომელიც მიხეილ სააკაშვილის სამოქალაქო კლინიკაში გადაყვანის მოთხოვნით შიმშილობს, “ტვ პირველთან” ამბობს:

“დღეს ჩვენ უკვე მიშა მივეცით სასაკლაოზე, დავუთმეთ ქართულ ოცნებას… არ გვაქვს მეორე ვარიანტი, უნდა გამოვიყვანოთ და მწყობრში ჩავაყენოთ ჩვენი მესამე პრეზიდენტი. ვეჭვობ, ეს დღეები ყველაზე სამარცხვინო დღეებია საქართველოს ისტორიაში.

ისე მოკლეს გამსახურდია, რომ არც ვიცოდით, აქ თვალწინ გვიკლავენ ადამიანს, რომელმაც 9 წელიწადში სახელმწიფო შექმნა. კი ბატონო, დააშავა ბოლოში… მეც დამიშავა, პირადად, მეც, მეც გამომაცხადა ქვეყნის მტრად, როცა რუსეთში ჩავედი სამღერად ბავშვების დასახმარებლად, საქველმოქმედო კონცერტზე. მაგრამ დღეს საქართველოს ვკარგავთ, ხალხო, ველური ქვეყნების სიაში შევდივართ. ჩემი ჩამოსვლის მიზანი იყო – მიშას გადარჩენა, მეორე – საზღვარგარეთიდან მოგვაპყრონ ყურადღება და მესამე – არ მინდა მსოფლიოს ეგონოს, რომ ჩვენ ვართ ველური ერი, რომელმაც ვათრიეთ და მოვკალით მესამე პრეზიდენტი.

წასული ვიყავი ქვეყნიდან საქმეებზე, როცა ის კადრები ვნახე. თავი მოგვჭრეს მთელ მსოფლიოში. ასეთი კადრები რომც ყოფილიყო, უნდა გაექროთ.

რა უნდათ ახლა ციხეში? ავადმყოფმა რომ დაინახოს ამათი ცინიკური სახეები, უფრო ცუდად გახდება. ამათი შეხვედრა როგორ შეიძლება?

ამას ბოლო უნდა მოეღოს, ბატონებო.”