„რაც ჩვენ ვნახეთ, ამის აღწერა შეიძლება ყველასთვის ცნობილი ფრაზით „არწივი ვნახე, დაჭრილი, ყვავ-ყორნებს ეომებოდა“ – ნიკა გვარამია

მიხეილ სააკაშვილის უფლებადამცველი, ნიკა გვარამია აცხადებს, რომ იუსტიციის სამინისტროს მიერ გავრცელებული კადრები უწყვეტი არ არის და მთავარი ძალადობის კადრები, რომელიც მიხეილ სააკაშვილის მიმართ ხორციელდებოდა, ამოჭრილია. ამის შესახებ ინფორმაციას ტვ პირველი ავრცელებს.

რაც დღეს ვნახეთ, ზუსტი მტკიცებულებაა იმის, რასაც ჩვენ ვამტკიცებდით. თუმცა ეს კადრები არ არის უწყვეტი კადრები და მთავარი ძალადობის ნაწილი მიხეილ სააკაშვილის წინააღმდეგ არის ამოჭრილი. მიუხედავად ყველაფრისა, რაც ჩვენ ვნახეთ, ამის აღწერა შეიძლება ყველასთვის ცნობილი ფრაზით „არწივი ვნახე, დაჭრილი, ყვავ-ყორნებს ეომებოდა“.

ზუსტად ეგრე იყო და ეს პარადიგმა მარტო ჩემს თავში კი არ გაცოცხლდა, ვაჟას უკვდავი სიტყვები, ყველა ქართველში გაცოცხლდა, მათ შორის, თქვენს მომხრეებშიც, „ქართულ ოცნებას“ მივმართავ. ეს პარადიგმა ძალიან მძლავრია და ქართველები ბავშობიდან ვსწავლობთ ამ პარადიგმას და ყოველთის არწივის მხარეს ვართ. არწივი არის მიხეილ სააკაშვილი, – თქვა გვარამიამ.