სცენა უკვე განთავსდა, ხმის გამაძლიერებელი აპარატურა მონტაჟდება – თბილისში, თავისუფლების მოედანზე, 20 საათზე, საქართველოს მესამე პრეზიდენტის მხარდამჭერი აქცია გაიმართება. “დადექი სწორ მხარეს, გამოდი გარეთ” – ეს აქციის ორგანიზატორების მოწოდებაა. ხალხმრავალ დემონსტრაციამდე ხუთ საათზე ნაკლები დრო რჩება.
თავისუფლების მოედანზე პოლიტიკოსები, ჟურნალისტები, ხელოვანები, სამოქალაქო აქტივისტები შეიკრიბებიან. ყველა ერთად მოითხოვს, რუსთავის ციხიდან მიხეილ სააკაშვილი თბილისში გადმოიყვანონ და სამოქალაქო საავადმყოფოში მოათავსონ.
წარმოუდგენელ სიგიჟეს ვადევნებთ თვალს, ხელისუფლება ჯიუტობს, რომ მიხეილ სააკაშვილის ჯანმრთელობაზე იზრუნოს. ეს ხელისუფლების საკანონმდებლო ვალდებულებაცაა და ადამიანური მოვალეობაც. როგორ შეიძლება, ასეთ საკითხზე ასეთ წარმოუდგენელ უგულობას ვუყურებდეთ? უფრო მეტიც, ისიც ვნახეთ, სანამ სახალხო დამცველმა განცხადება არ გააკეთა, როგორ ტყუოდა ხელისუფლება, რომ მიხეილ სააკაშვილი რაღაც ტიპის საკვებს იღებდა. ამიტომაც აქციის, რომელიც 8 საათზე გაიმართება, მთავარი მიზანი იქნება საქართველოს პრეზიდენტის ისეთ საავადმყოფოში გადაყვანა, სადაც ყველა შესაბამისი მომსახურების გაწევა იქნება შესაძლებელი – აღნიშნა აქციის ერთ-ერთმა ორგანიზატორმა, ირაკლი აბესაძემ.
აქციის ორგანიზატორების ინფორმაციით, საპროტესტო ღონისძიებაზე დასასწრებად მოქალაქეები მთელი საქართველოდან მოემართებიან, მათ შორის იქნებიან ემიგრანტებიც, რომლებიც საქართველოს მესამე პრეზიდენტის გათავისუფლების მოთხოვნით უცხოეთიდან სპეციალურად ჩამოვიდნენ.
თავისუფლებიოს მოედანზე მოქალაქეების დარჩენაც იგეგმება, ამიტომაც ტერიტორიაზე კარვებიც გაიშლება.
კომენტარები