თბილისში დაგეგმილ მასშტაბურ აქციას უერთდებიან რეგიონებიდანაც – აჭარიდან, გურიიდან, იმერეთიდან და სამეგრელოდან ავტოკოლონები უკვე დაიძრა. ადგილობრივები ამბობენ, რომ საქართველოს მესამე პრეზიდენტი პუტინისა და ივანიშვილის პირადი პატიმარია და უნდა გათავისუფლდეს.
“ყველანი ძალიან კარგად ვხვდებით, რომ დღეს ჩვენი ქვეყნის თავისუფლებისა და სუვერენიტეტის დაცვა მართლა გადის საქართველოს მესამე პრეზიდენტის ჯანმრთელობასა და სიცოცხლეზე. მე მგონია, რომ მთელი ქვეყნის ღირსების საკითხია, რომ ჩვენ არ მივცეთ ივანიშვილს, პუტინის, ამ ადამიანების ჯგუფს, რომ დაჩაგროს საქართველოს მესამე პრეზიდენტი და ჩვენი ქვეყანა”, – თქვა ენმ-ს ერთ-ერთმა ლიდერმა, გიორგი კირთაძემ.
ხელისუფლების ოპონენტები ითხოვენ, რომ მიხეილ სააკაშვილი შესაბამის კლინიკაში გადაიყვანონ, ასევე, ჩაინიშნოს ვადამდელი არჩევნები. იმერეთიდან აქციაზე რამდენიმე ათას ადამიანს ელოდებიან.
“ფეხს არ მოვიცვლით რუსთაველიდან მანამ, სანამ არ შესრულდება ჩვენი მთავარი მოთხოვნა და სასწრაფო წესით კლინიკაში არ იქნება გადაყვანილი მიხეილ სააკაშვილი, ეს არის ნომერ პირველი მოთხოვნა”, – თქვა ენმ-ს ერთ-ერთმა ლიდერმა, ანი წითლიძემ.
ცნობისთვის, თბილისშია აქცია თავისუფლების მოედანზე, 8 საათზე გაიმართება.
კომენტარები