ლევან ჯავახიშვილი
„ალიას“ ესაუბრება „არმიის სამოქალაქო კონტროლის ჯგუფის“ ხელმძღვანელი, პოლიტიკური დევნილი, დავით ნემსაძე.
– დათო, როგორ შეაფასებ საქართველოს ბოლოდროინდელ პოლიტიკურ მოვლენებს? რა იყო მიშა სააკაშვილის ჩამოსვლის რეალური მიზანი, რა ინფორმაცია გაქვს?
– სააკაშვილის ჩამოსვლის რეალური მიზანი იყო ქვეყანაში არეულობა. რასაც „ქოცები“ იძახიან, რომ სააკაშვილი მშიშარა კაციაო, მშიშარა ნაღდად არ არის. მშიშარა ის არის, ვინც მაგას იძახის სააკაშვილზე. სააკაშვილი არის კაცი, რომელიც ხელისუფლების მანიით არის შეპყრობილი. ეს სხვა და კიდევ უფრო მძიმე დაავადებაა, ვიდრე ქრონიკული შიში. ნეტავ, მართლა მშიშარა იყოს.
მან ყველა არალეგალური გზა იცის, რომლითაც ამა თუ იმ ქვეყნიდან შეიძლება საქართველოში შემოღწევა და აქედან გასვლა. შემოვიდა იმ გზით, რომელი გზითაც საქართველოში შემოდის ნარკოტიკი. ეს სააკაშვილმა კარგად იცოდა, იმ ჯგუფებმაც კარგად იცოდნენ, ვინც ის შემოიყვანეს საქართველოში და სააკაშვილის ხელისუფლების დაბრუნების შემთხვევაში, გარკვეულ სარგებელს ელიან.
პროცესში ჩართული იყო რამდენიმე სახელმწიფო, მათ შორის, უკრაინაც. მისი ხელისუფლებაში დაბრუნება აწყობთ უკრაინელ გლობალისტებს და აქეთკენ მიისწრაფვის დღეს უკრაინა. ეს ერთი მოცემულობაა. არსებობს სხვა რეალობა.
რა პოლიტიკური მოცემულობაა საქართველოში და როგორ უყურებს დღეს საქართველოს მოსახლეობა სააკაშვილის პერსონას. ხალხი უყურებს, ხედავს, რა მძიმე სოციალური ვითარებაა ქვეყანაში, როგორ მდიდრდება უსაშველოდ მოსახლეობის 10% დანარჩენი მოსახლების ხარჯზე, როგორ ხრავენ ბიუჯეტს ჩვენი ჩინოვნიკები და პოლიტიკოსები. ეს და კიდევ ქვეყანაში გამეფებული მრავალი სახის უსამართლობა იყო ლაიტმოტივი, ფონი, რამაც მისცა სააკაშვილს იმის გამბედაობა, რომ შემოსულიყო ქვეყანაში და „ნაცების“ გარდა, სხვა ხალხის მხარდაჭერის იმედიც ჰქონოდა.
თუ შემეკითხები იმას, რომ „ქართული ოცნება“ რამდენად ელოდა მის საქართველოში დაბრუნებას, ეს საუბრის სხვა თემა კი იქნება, მაგრამ ხელისუფლებისთვის მისი დაბრუნება საქართველოში იყო მოულოდნელი აქტი. დიახ, არ ელოდნენ ამას. კურიოზული ის იყო, საერთოდ არ იცოდნენ, სააკაშვილი საქართველოში იყო თუ არა შემოსული. „ქოცების“ ხელისუფლებას არ ჰყავს ქვეყნის ის სპეცსამსახური, რომელიც იზრუნებდა ქვეყნის სტაბილიზაციაზე. ამ შემთხვევაში, სააკაშვილის შემოსვლა რომ შევაფასოთ, სპეცსამსახურების მესვეურნი ისე არიან შეპყრობილნი თავიანთი ძალაუფლებით, დარწმუნებულნი იყვნენ, მიშა არ იყო ის კაცი, რომელიც ჩამოვიდოდა საქართველოში და თავს დააჭერინებდა. რეალურად, ჩვენ ხომ არც პოლიცია გვყავს და არც სუს–ი. ვახტანგ გომელაური და გიორგი ლილუაშვილი, თავიანთი პოლიციითა და სუს–ით არიან ბიძინა ივანიშვილის ხაზინისა და მისი და მისი ოჯახის უსაფრთხოების დამცველები. ამ საქმეს როდესაც მორჩებიან, მერე თუ დრო მორჩათ, შეიძლება სახელმწიფო საქმეებისთვისაც მოიცალონ.
ჯერ კიდევ მიშას შემოსვლამდე იყო სუს–ი რეტდასხმული. „ნაცმოძრაობამ“ უამრავი საიდუმლო ფაილი გაუსაჯაროვა სუს–ს მისსავე არქივიდან და ამით დაგვანახა, რომ ნებისმიერმა მოქალაქემ საკუთარ სახლში ან ნებისმიერ სხვა ადგილას უფრო საიმედოდ შეიძლება შეინახოს, გადამალოს დავუშვათ, ტანკი, ვიდრე ქვეყნის უსაფრთხოების მთავარმა სამსახურმა გრიფით „სრულიად საიდუმლო“ ფაილები. ეს იყო სუს–ის გაფარჩაკება. სუს–ი აგროვებდა ინფორმაციას ყველა აქტიურ პირზე და ფაქტიურად, იმ არასწორი რეფორმით, არსახელმწიფოებრივი მიდგომებით, რომელიც „ქართულმა ოცნებამ“ გაატარა, აღმოჩნდა, რომ სუს–ში 80% დარჩა „ნაცმოძრაობის“ აგენტი. ლილუაშვილი და გომელაური საკუთარი კაბინეტის იქით ვერ იხედებიან და „კაბინეტის ვირთხებმა“ ვერ გაართვეს თავი პროცესების მართვას და სააკაშვილი აღმოჩნდა საქართველოში. …ცნობადი სახე ცოლს ვერ დაურეკავს და ვერ ჰკითხავს ისე, როგორი საცვალი უყიდოს, რომ ეს სპეცსამსახურებმა არ იცოდნენ. ასეთი გლობალური მოსმენა არის სირცხვილი. საბჭოთა კავშირის დროს, ასეთ ინფორმაციებს ფლობდნენ უბნის პოლიციის თანამშრომლები. ეს სახელმწიფო არ არის.
ბიძინა ივანიშვილს ეტყობა, სიამოვნებს იმის ცოდნა, ვისი ვიოლინო ვის როიალშია და მისთვის აგროვებენ ამდენ იდიოტურ, უსარგებლო ინფორმაციას. ამასობაში კი, ქვეყნის მთავარი ძებნილი შემოეპარათ და თავად რომ არ დაედო ვიდეოები, საქართველოში ვარო, ესენი ტყემალზე ისხდნენ. ამ ყველაფრის შედეგი იქნება ძალიან მძიმე.
როგორც 2012 წელს იყო ხელისუფლების დათმობა გარდაუვალი, ახლაც მოხდება. ხალხს უნდა ცვლილებები. არ მუშაობს ეს „ცოცხების პოლიტიკა“, არ მუშაობს „ახლა დავდგები და იმას გავაკეთებ, რაც 2012–13 წლებში უნდა გამეკეთებინა“. მაშინ რაც უნდა გაეკეთებინათ, ის უკვე გაკეთებული უნდა იყოს და ახლა 2021 წელია და სხვას უნდა აკეთებდნენ. იმას არავინ ამბობს, რომ ის კარგია, რაც იყო, მაგრამ უკეთესი რა გააკეთა „ქართულმა ოცნებამ“? ვილაპარაკოთ, რა. რაც შეეხება ქვეყნის პოლიტიკურ მომავალს, თუ ჩემი ერი თვლის, რომ მიხეილ სააკაშვილზე მეტს არ იმსახურებს, მაინც და მაინც მისით უნდა ჩანაცვლდეს ბიძინა ივანიშვილი, კი, ბატონო, ყავდეს მიხეილ სააკაშვილი, პირდაპირ გეუბნები ამას, მომავალში კი მიხვდებიან, რას ნიშნავს რევანში და სისხლის მდინარეები ქვეყანაში…
კომენტარები