“არ გვინდა წარსულის დაბრუნებაო, სცენაზე ვისაც უყურებდნენ, ის მომავალი იყო?” – ბესელია

პოლიტიკოსი, ეკა ბესელია “ტვ პირველთან” დღევანდელ აქციაზე საუბრობს და ამბობს:

“ადამიანების უკანონო მოსმენების და შანტაჟის ჩამდენ ხელისუფლებას უკრავ ტაშს, თუ არ გაქვს განცდა, რომ შენ ამით ახალისებ და ხარ მორალური პასუხისმგებელი – ნუ, მაშინ, ვერასოდეს შევთანხმდებით. რასაც არ უნდა ამოეფარნონ – არ გვინდა წარსულის დაბრუნებაო, სცენაზე ვისაც უყურებდნენ, ის მომავალი იყო? ვისაც ხედავ ქართული ოცნების სახით, იგივე კობახიძე, ის წარსულის ბრძოლაში სად იყო, ვინმეს ახსოვს? სად ეძებენ ამ მომავალს? დღეს როდესაც გინდა იყო მორალურად მყარად მდგომი ხელისუფლება და იქვე მეორე კადრია, 2 დღის წინ ციხესთან გამართული სამარცხვინო აქციის, სადაც დააყენებ რიგში ადამიანებს და კოლექტიურად დედას აგინებინებ და დაგავიწყდება, რომ ზუსტად იმ რუსთაველზე, წინა ხელისუფლების დროს, კოლექტიურად, აწ გარდაცვლილი ბადრის დედას აგინებდნენ, ეს გვზარავდა, არ მოგვწონდა – დღეს რატომ მოგვწონს? სახელი შეიცვალა ვისაც აგინებ, თორემ იგივეს აკეთებ. როდესაც იქ ვდგევართ, სადაც ადამიანებს ამ როლში აყენებ, რა მოგწონს? რას უკრავ ტაშს? ეს სასამართლო მოგწონს? ეკლესიის მაგინებელიო, ეკლესიის არც ერთი რანგის პირი არ დარჩა, ვისაც არ უსმენენ, არ უთვალთვალებენ, თურმე, და ჩანაწერებს აკეთებენ, თვალი გაახილეთ. სირაქლემას როლში როგორ უნდა იყოთ? არ შეიძლება ის მოგწონდეს, რაც გამოვიარეთ.”