„როცა ამას ნაციონალური მოძრაობის წინააღმდეგ აკეთებენ, მედიას პროტესტი აქვს, მაგრამ როდესაც ჩემი ოჯახის მისამართით ხდება ცილისწამებისა და სიძულვილის კამპანია, თურმე ეს მისაღებია. ასეთი ორმაგი სტანდარტები არ ვარგა,“- ამის შესახებ თბილისის მერობის კანდიდატმა კახა კალაძემ დღეს მედიასთან საუბრისას განაცხადა. მერობის კანდიდატმა მედიასაშულებებს ცილისწამებისა და სიძულვილის კამპანიის მიმართ, განურჩევლად ადრესატებისა, თანაბარი დამოკიდებულების გამოხატვისკენ მოუწოდა.
კახა კალაძე:
„მე ხომ არ ვიგონებ ამას, აბსოლუტურად გულწრფელად გამოვხატავ გულისტკივილს. ჩართეთ ნაციონალური მოძრაობის ტელევიზიები და ნახეთ, რა ცილისწამება, რა ვიდეოკლიპები გადის და რა ენით საუბრობენ, როგორი შეურაცხყოფა გვესმის. დავანებოთ თავი იმას, რომ პოლიტიკოსი ვარ, მაგრამ აქაც ხომ რაღაც ზღვარი არსებობს და წითელი ხაზები, რომელიც არ უნდა გადავკვეთოთ? ცილს სწამებენ ჩემს მეუღლეს, დედას, მამას, მცირეწლოვანი ბავშვების ბანერებს წითელი საღებავი შეასხეს. რაზე ვსაუბრობთ საერთოდ? მე რომ გამოვიდე და დავიწყო შეურაცხყოფების მიყენება ნიკა მელიას, გვარამიას ან ნებისმიერის ოჯახის წევრებზე, ეს ნორმალური და მისაღებია? ეს მოსწონს საზოგადოებას? თქვენ ჟურნალისტები ამ ყველაფერს ხედავთ, აშუქებთ და რატომ არ გიჩნდებათ პროტესტის გრძნობა? ანუ, თუ ჩემ წინააღმდეგ აკეთებენ, კარგია, ტაში უნდა დავუკრათ, თუ ნაციონალური მოძრაობის წინააღმდეგ აკეთებენ, ეს როგორ შეიძლება. ასეთი დამოკიდებულება არ ვარგა, მეგობრებო. თუ ჩვენ არ გვექნება ერთნაირი მიდგომა და გვექნება ორნაირი სტანდარტი. რასაც პარტიული ტელევიზიები აკეთებენ, ძალიან მძიმე შედეგებამდე მიგვიყვანს“
კომენტარები