იმის მიუხედავად, რომ გასულ კვირას ყველა ტიპის საწვავზე ფასმა ისტორიულ მაქსიმუმს მიაღწია, ექსპერტები და ეკონომისტები შემდეგი კვირიდან ფასების კიდევ რამდენიმე პროცენტით გაზრდას აანონსებენ.
ბოლო ერთი თვის მონაცემებით, საწვავზე ფასი უკვე 5%-ით არის გაზრდილი, ხოლო ბოლო 1 წელში – 46%. გაზრდილია ფასი ე.წ. თხევად გაზზეც – 8%-ით.
ყოველივე ეს დამატებით პრობლემებს ქმნის მეწარმეებისთვისაც. ისინი ამბობენ, რომ უძვირდებათ ფასი სატრანსპორტო მომსახურებაზე და შესაბამისად ძვირდება პროდუქციაც.
რაც შეეხება მიზეზებს, ეკონომისტები აღნიშნავენ, რომ საწვავის გაძვირებაზე საერთაშორისო ფასს აქვს ყველაზე დიდი გავლენა, თუმცა ქვეყანაში არსებული ფონი, მათ შორის ვალუტის არასტაბილური კურსი, მასზე კიდევ უფრო დიდ გავლენას ახდენს.
მათივე თქმით, ხელისუფლება არ დგამს სწორ ნაბიჯებს იმისთვის, რომ ფასები დასტაბილურდეს
“საწვავზე და სხვა იმპორტირებულ პროდუქციაზე ფასების ზრდა თავიდან ბოლომდე განპირობებულია საქართველოს მთავრობის 9-წლიანი არასწორი ეკონომიკური პოლიტიკით. იმ კორუმპირებული და ანტისახელმწიფოებრივი ქმედებებით, რომელიც ბოლო წლებში სახელმწიფო უწყებებმა გაატარაეკონომიკის მიმართულებით. ჩვენ რომ დღეს გვქონდეს ეკონომიკური პარამეტრები, რომელიც გვქონდა 2012 წელს, ვგულისხმობ ლარის კურსს, საერთაშორისო ბაზარზე ნავთობპროდუქტების ფასს და აქციზის რაოდენობას, დღეს საწვავის ღირებულება არ უნდა აღემატებოდეს 2 ლარს”, – თქვა პლატფორმა 20/20-ის თავმჯდომარე ვასო ურუშაძემ.
ფასების დასტაბილურებისთვის მნიშვნელოვან ნაბიჯად ასახელებს აქციზის გადასახადის შემცირებას ფინანსისტი გიგა ბედინეიშვილი.
“ჩვენ რაც შეგვიძლია გავაკეთოთ, არის ის, რომ აქციზის გადასახადი, რომელიც ზის ამ ბენზინის ფასში, ის უნდა შევამციროთ. იმის მაგივრად, რომ ფლანგოს ფული [ხელისუფლებამ] როგორც ამას აკეთებს, შეამციროს ხარჯები. შესაბამისად, ნაკლები საჭიროება იქნება გადასახადების იმ დონის ამოღებისა”, – ამბობს ბედინეიშვილი.
მთავარი
კომენტარები