“საბჭოთა დროს ვინ გაბედავდა აცრების წინააღმდეგ წასვლას, ახლა სიტყვის თავისუფლებაა და წამლავენ ანტივაქსერები სოციალურ ქსელებს…” – რომან გოცირიძე

“ენმ”-ის წევრი, რომან გოცირიძე:

“მე-18-ე საუკუნეში მსოფლიოში სიცოცხლის საშუალო ხანგრძლივობა იყო დაახლოებით 33 წელი, ევროპაში-35 წელი; მე-19-ე საუკუნეში შესაბამისად 33-39 და 40-45 წელი. მედიცინის განვითარებამ და უპირველეს ყოვლისა მასობრივმა იმუნიზაციამ რადიკალურად შეცვალა სურათი. დღეს ადამიანი თითქმის ორჯერ მეტხანს ცოცხლობს, ვიდრე ასი წლის წინათ.

ანტივაქსერობა, როგორც ჩანს ბრადმორწმუნეობის ნაირსახეობა აღმოჩნდა და ამ კატეგორიის ადამიანთა თავებზე არგუმენტები ნაკლებად მოქმედებენ. ეს რიცხვები უფრო დაბნეულებისათვის შეიძლება იყოს რაღაცის მთქმელი, თორემ ჩამოყალიბებულ ანტივაქსერზე შეუვალი არაფერი ყოფილა. როცა სიკვდილი არაა არგუმენტი, სტატისტიკამ რაში შეიძლება დაარწმუნოს.

როგორც ჩანს, საზოგადოების განვითარების ერთ-ერთი კრიტერიუმი მასში ანტივაქსერთა პროცენტული რაოდენობაც ყოფილა. შეიძლება ეს პირდაპირ იყოს კავშირში ქვეყნის მშპ-სთან. ალბათ, ვინმე გააკეთებს ამ სახის კვლევასაც.

საქართველო სიცოცხლის საშუალო ხანგრძლივობით (73 წელი) მსოფლიოში 98-ე ადგილზეა 191 ქვეყანას შორის. ამას ანტივაქსერობას ნამდვილად ვერ დავაბრალებთ. უმეტესობა ჯერ კიდევ აცრილები ვართ. საბჭოთა დროს ვინ გაბედავდა აცრების წინააღმდეგ წასვლას. ახლა სიტყვის თავისუფლებაა და წამლავენ აქტიური ანტივაქსერები სოციალურ ქსელებს თავიანთი სულელური მოსაზრებებით. ბევრი რომ იჯერებს, ესაა სატირალი.”