ზოგადად, საზოგადოებისთვის ძალიან მნიშვნელოვანია, იცოდეს ვინ შეიძლება შევაფასოთ მძიმე პაციენტად და ვის სჭირდება ჰოსპიტალიზაცია, რადგან როდესაც კორონავირუსით ინფიცირების ბევრი შემთხვევაა, აქტუალურია ჰოსპიტლებში მოხვდნენ ის ადამიანები, რომელთათვისაც ეს სასიცოცხლოდ აუცილებელია, – ამის შესახებ ინფექციონისტმა, ალექსანდრე გოგინავამ „იმედის დილაში“ სტუმრობისას განაცხადა, რომელმაც განმარტა, თუ რა შემთხვევაში ითვლება პაციენტის მდგომარეობა მძიმედ.
მან ჩამოთვალა ის სიმპტომები, რომლის დროსაც პაციენტი დაუყოვნებლივ უნდა იყოს გადაყვანილი კლინიკაში.
„პირველ რიგში, ეს არიან ის ადამიანები, რომელთაც სუნთქვის უკმარისობა აქვთ. მოგეხსენებათ, კორონავირუსული ინფექცია პირველ რიგში ყველაზე მეტად აზიანებს ფილტვებსა და სასუნთქ გზებს, ამდენად, ყველაზე ხშირი სიმპტომები სუნთქვასთან დაკავშირებულია. სუნთქვის უკმარისობა კლინიკებში სხვადასხვაგვარად ფასდება. სახლის პირობებში ასეა შესაძლებელი: თუ პაციენტს აქვს გაძნელებული სუნთქვა, ქოშინი, ადვილად იღლება, ცხვირ-ტუჩის გარშემო სილურჯე აღენიშნება, ასევე თუ ოჯახში გვაქვს პულსოქსიმეტრი და ჩვენ განვსაზღვრავთ სატურაციას და ვნახავთ, რომ 90-ზე დაბალია, აი, ეს მაჩვენებლები უკვე არის საგანგაშო და ასეთი პაციენტები ჰოსპიტალში გადაყვანას საჭიროებენ.
ამასთან, თუ ადამიანს აქვს შეუპოვარი ცხელება, რომელიც სიცხის დამწევ საშუალებებს არ ემორჩილება და ეს ცხელება ძლიერ სისუსტეს იწვევს. აქვს ძილიანობა, განსაკუთრებით აქტუალურია ეს სიმპტომები ბავშვებში. ასეთ შემთხვევაში მნიშვნელოვანია, ბავშვი იყოს სამედიცინო დაწესებულებაში ექიმის მეთვალყურეობის ქვეშ.
ასევე, ის პაციენტები, რომელთაც ქრონიკული დაავადება აღენიშნებათ და კოვიდის მართვა ბინაზე შეუძლებელია. ძირითადად, ასეთი პაციენტები უნდა იყვნენ გადაყვანილი საავადმყოფოებში“, – განაცხადა გოგინავამ.
კომენტარები