კორონავირუსის დელტა ვარიანტით ინფიცირებული პაციენტები ჰოსპიტალიზაციას ორჯერ უფრო ხშირად საჭიროებენ, ვიდრე ეგრეთ წოდებული ბრიტანული შტამით ინფიცირებულები. ამის შესახებ გამოცემა Bloomberg წერს.
მსოფლიო მასშტაბით ექიმები აღიარებენ, რომ დელტას შტამის გავრცელება მძიმე ტვირთს აყენებს ჯანდაცვის სისტემებს.
”შედეგები აჩვენებს, რომ დელტას ვარიანტის გავრცელებამ არავაქცინირებულ მოსახლეობას შორის შეიძლება გამოიწვიოს უფრო დიდი ტვირთი ჯანდაცვის სერვისებზე, ვიდრე ალფა ვარიანტით ინფიცირების შემთხვევებმა”, – ნათქვამია კვლევაში.
გაერთიანებული სამეფოს ჯანდაცვის სამინისტროსა და კემბრიჯის უნივერსიტეტის მეცნიერებმა, 2021 წლის 29 მარტიდან 23 მაისის ჩათვლით პერიოდში, ინგლისში კორონავირუსით დაავადებული 43,000-ზე მეტი პაციენტის სამედიცინო ისტორია შეისწავლეს. მათგან 34,656 პაციენტი ალფა ვარიანტით იყო ინფიცირებული, ხოლო 8682 პაციენტი დელტა ვარიანტით. ამავდროულად, ავადმყოფთა თითქმის სამი მეოთხედი არ იყო ვაქცინირებული, 24% მხოლოდ პირველი დოზით იყო აცრილი, ხოლო 2% სრულად იყო ვაქცინირებული.
მკვლევრებმა დაასკვნეს, რომ ინფიცირებიდან 14 დღის განმავლობაში, ჰოსპიტალიზაციის ან გადაუდებელი დახმარების საჭიროება დელტა შტამით ინფიცირებულ პაციენტებში უფრო მეტი იყო, ვიდრე ალფა ვარიანტით ინფიცირებულებში.
გარდა ამისა, იმ დელტა ვარიანტით ინფიცირებულ პაციენტებს, რომლებიც არ იყვნენ აცრილნი ან რომელთა ვაქცინის პირველი დოზის მიღებიდან 21 დღეზე ნაკლები იყო გასული, ჰოსპიტალიზაციის უფრო მაღალი საჭიროება ჰქონდათ, ვიდრე ალფა ვარიანტით ინფიცირებულებს.
Bloomberg-ს კვლევის თანაავტორმა, ენ პრესანისმა განუცხადა, რომ სრულ ვაქცინაციას გადამწყვეტი მნიშვნელობა აქვს დელტა შტამით ინფიცირებული ადამიანების ჰორსპიტალიზაციის რისკის შემცირების თვალსაზრისით.
კომენტარები