მკვლელია ეს ხელისუფლებაც, ანტივაქცერებიც და რეგულაციების გამკაცრების მოწინააღმდეეგეებიც – სალომე სამადაშვილი

“ისლანდია, სრულად ვაქცინირებული – არც ერთი გარდაცვალება; 17 კოვიდ პაციენტი;

ავსტრალია – 1000 ახალი შემთხვევა – მყისიერად გამკაცრებული რეგულაციები, ქუჩაში მოწყობილი ასაცრელი პუნქტები და სრული მობილიზაცია აცრების 100%-იანი შედეგის დასადებად;

საქართველო-მხოლოდ 7 პროცენტი აცრილი, 70 გარდაცვლილი დღეში, ათასობით ახალი შემთხვევა – პასუხი – რესტორნის “ცოტა ადრე” დაკეტვა, არჩევნების გადადებაზე საუბარიც არა, და, აცრა არა, პირბადეა მთავარი, გვეუბნება ჯანდაცვის მინისტრი, რადგან ამომრჩევლის 40% ანტივაქცერია,”- ასე ეხმაურება ოპოზიციონერი დეპუტატი სალომე სამადაშვილი ქვეყანაში შექმნილ მძიმე ეპიდემიოლოგიურ ვითარებას და კოვიდ 19-ის გამო გარდაცვალების დღევანდელ მაღალ მაჩვენებელს.

შექმნილ სიტუაციაში სამადაშვილი პასუხისმგებლობას ხელისუფლებას აკისრებს და წერს, როგორ განვითარდებოდა მოვლენები როგორც თავად აღნიშნავს  „ნორმალურ ქვეყანაში.“

„მკვლელია ეს ხელისუფლებაც, ანტივაქცერებიც და რეგულაციების გამკაცრების მოწინააღმდეეგეებიც.

ნორმალურ ქვეყანაში:მასობრივი ვაქცინაციის კამპანია დაიწყებოდა – მოხალისეების მომზადება, ქუჩებში ყოველ კუთხეში გახსნილი ვაქცინაციის ცენტრებით;

ყველა-ცნობილი სახე, პოლიტიკოსი, ჟურნალისტი თუ სხვა დღეს საარჩევნო კამპანიით არა-ვაქცინაციის კამპანიით იქნებოდა დაკავებული;

ეკლესიები ანტივაქცერული პროპაგანდის ცენტრი არა, აცრისთვის განკუთვნილი სივრცეები გახდებოდა;

რეგულაციები გამკაცრდებოდა და მათ დარღვევაზე რეაგირებაც;

და ცხადია, არჩევნები გადაიდოს თუ არა, ამაზე სამთავრობო ნომენკლატურული ეპიდემიოლოგების პროპაგანდა არ ჩაირთვებოდა, რეალურად დამოუკიდებელ სამეცნიერო აზრს გაითვალისწინებდა ხელისუფლება.

ეს ნორმალურ ქვეყანაში, აქ მხოლოდ ვითვლით, რამდენი ადამიანი კვდება ყოველ დღე, ეჭვი მაქვს იმასაც კარგად ვერა,” წერს სამადაშვილი