პარტია ,,საქართველოსთვის“ თავმჯდომარის მოადგილე, ნათია მეზვრიშვილი:
„გვსურს საზოგადოებას საარჩევნო კანდიდატების და მხარდამჭერების მიმართ განხორციელებული მორიგი დანაშაულების შესახებ მივაწოდოთ ინფორმაცია. ხელისუფლება პრაქტიკულად იმ მეთოდებს იყენებს, რომლებიც ძალიან კარგად ახსოვს საზოგადოებას 2011-12 წლებში. აღსანიშნავია, რომ ხელისუფლება ცდილობს ეს გააკეთოს შეფარული მეთოდებით და სახე ამგვარად შეინარჩუნოს, თუმცა ეს ყველაფერი ბუნებრივია დაფარული ვერ დარჩება.
მუქარა-ზეწოლები ხორციელდება, როგორც კანდიდატების და მხარდამჭერების – ისე მათი ახლობლებისა და ნათესავების მისამართით.
პარტიის მაჟორიტარობის კანდიდატს, გია სოლომნიშვილს რომელიც გურჯაანის მერიის დაქვემდებარებაში არსებულ ერთ-ერთ აიპში მუშაობს შემდუღებლად – დაემუქრნენ სამსახურიდან განთავისუფლებით, იმ შემთხვევაში თუ ეს ადამიანი არ შეწყვეტდა პარტიის მხარდაჭერას და პარტიის საქმიანობაში აქტიურ მონაწილეობას .
პარტიის აქტიური მხარდამჭერის ყვარლის მერიის მთავარი სპეციალისტის ლევან ხუციშვილის მიმართ აქტიურად იყენებენ პოლიციას, რომელიც ფაქტიურად ეუბნება მხარდამჭერს, რომ პრობლემებს შეუქმნის მას.
პარტიის სამცხე-ჯავახეთის რეგიონალური კოორდინატორის ლევან თათოშვილის დედის და დეიდის მიმართ განახორციელეს მუქარა-ზეწოლა, კერძოდ გუბერნატორმა დაიბარა ეს ადამიანები და სამსახურიდან წასვლა მოსთხოვა ლევანის აქტიური მხარდაჭერის გამო პარტიის მიმართ და უარის შემთხვევაში დაემუქრნენ რეორგანიზაციით გაშვებით.
იმერეთის რეგიონში დაფიქსირდა ერთ-ერთი შემთხვევა – მაჟორიტარობის კანდიდატს მერი დაემუქრა ბიზნესზე ზეწოლით და პარტიულ საქმიანობაზე უარის ართქმის შემთხვევაში პრაქტიკულად პირდაპირ უთხრეს, რომ აკაკი ბართაიას ბედს გაიზიარებდა.
კახეთის რეგიონში დაფიქსირდა ბიზნესზე ზეწოლის არაერთი შემთხვევა. ადგილობრივი ძალოვანი უწყების წარმომადგენლები ადამიანებს დაემუქრნენ ჩვენს პარტიაში გადმოსვლის შემთხვევაში ბიზნესისთვის პრობლემების შექმნით. თითოეულ ამ ქეისზე დღეს ჩვენი პარტიის ღირსეული წარმომადგენლები დეტალურად ისაუბრებენ.
მე არ შემიძლია განსაკუთრებული მხარდაჭერა გუნდის სახელით არ გამოვუცხადო აკაკი ბართაიას იმ გამბედაობისთვის, რომელიც მან გამოავლინა და მინდა დავპირდე მას გუნდის სახელით, რომ აუცილებლად ჩვენ ბოლომდე ვიბრძოლებთ უკანონოდ დაკავებული აკაკი ბართაიას გათავისუფლებისთვის.
მინდა ხელისუფლებას მოვუწოდო – მოვითხოვთ, რომ დაუყოვნებლივ შეწყვიტოთ ამ უკანონო მეთოდების გამოყენება. მინდა სამართალდამცავი ორგანოების გასაგონად ვთქვა – ის, რასაც დღეს ჩვენ ვლაპარაკობთ და ის, რაც ყველა წინა ბრიფინგზე ვილაპარაკეთ – ყველაფერი დანაშაულის ნიშნების შემცველია და სამართლებრივ სახელმწიფოში ამას უნდა მოყვეს რეაგირება. ამაზე რეაგირება უნდა იყოს არა ისე, როგორც აკაკი ბართაიას საქმეზე მოყვა – დღემდე პროკურატურას ამ ფაქტზე – გამოძიება ადამიანის უკანონო დაკავებაზე, იარაღის ჩადებაზე და თავისუფლების უკანონო აღკვეთაზე – როდესაც სასამართლოდან ეს ადამიანი ციხის მიმართულებით მიჰყავდათ – არ დაუწყია.
ჩვენ ველოდებით ხელისუფლების მხრიდან რეაგირებას, ამ მოქმედებების შეწყვეტას და ჩვენი მხარდამჭერების გასაგონად მინდა ვთქვა – რომ ამ ყველაფერზე აუცილებლად ხმამაღლა უნდა ვილაპარაკოთ კიდევ უფრო აქტიურად, იმიტომ, რომ ეს არის გზა, რომელიც ხელისუფლებას აუცილებლად მიიყვანს დასასრულამდე – რა თქმა უნდა არჩევნების გზით“
კომენტარები