დაავადებათა კონტროლის ცენტრის თანამშრომელი მირიან მურჯიკნელი გარდაიცვალა. ინფორმაციას ღვაწლმოსილი თანამშრომლის გარდაცვალების შესახებ ცენტრი ავრცელებს.
“დაავადებათა კონტროლისა და საზოგადოებრივი ჯანმრთელობის ეროვნული ცენტრი უდიდესი მწუხარებით იუწყება, რომ გარდაიცვალა ცენტრის ღვაწლმოსილი თანამშრომელი მირიან მურჯიკნელი.
განუზმოლად დიდია ბატონი მირიანის როლი ქვეყნის ფინანსური და ჯანდაცვის სისტემების ტრანსფორმაციაში – ჯანდაცვის დაფინანსების ახალი მოდელების შექმნასა და ანგარიშგების თანამედროვე სისტემების დანერგვაში. იგი დაუღალავად გადასცემდა თავის ცოდნასა და გამოცდილებას სტუდენტებსა და თანამშრომლებს, იყო საუკეთესო მენტორი, მეგობარი, სიახლეებისა და ცვლილებების მხარდამჭერი.
მირიან მურჯიკნელის გარდაცვალება დიდი დანაკლისია ცენტრისთვის და მთლიანად ჯანდაცვის სფეროსთვის, ასევე ყველა იმ ადამიანისთვის, რომლებმაც მისი ხელმძღვანელობით და მხარდაჭერით შეძლეს ქვეყანაში ბოლო 30 წლის განმავლობაში ბევრი წარმატებული პროექტის განხორციელება” – ვკითხულობთ დაავადებათა კონტროლის ეროვნული ცენტრის მიერ გავრცელებულ ინფორმაციაში.
კომენტარები